صحيفة المريخ اون لاين
صفحة 2 من 49 الأولىالأولى 1 2 3 4 5 6 12 ... الأخيرةالأخيرة
النتائج 11 إلى 20 من 490
     
  1. #11
    إعلامي مريخي
    رقم العضوية : 1718
    تاريخ التسجيل : Jan 2010
    المشاركات: 252
    التقييم: 50
    معدل تقييم المستوى
    49

    افتراضي من هنا وهناك

    [frame="9 10"]
    متصدرين ومقدرين



    حبوب سنبلة تجف


    ستملأ الوادى سنابل!


    (محمود درويش)


    *نحن اليوم متصدرين


    *ومقدرين


    *متصدرين بفوز يبدأ العهد الجديد


    *ومقدرين للوالى ما سلف


    *المريخ اليوم تحت قيادة جديدة


    *تدريبا وادارة


    *وليت الجمهور يحضر


    *نحن عارفين زعل الجمهور


    *وكمان عارفين انو الزعل براهو


    *والواجب براهو


    *الجمهور واقفين طابور


    *وهم جزء اصيل فى استعادة الروح


    *الروح التى غابت طويلا


    *لعل ضرب اللون اليوم سيعيدها


    *نصر اليوم مهداء الى


    *جمال الوالى


    *لم يستبق شيئا


    *وهاهو يغادر وليس فى قلبه


    الا حب ومعزة


    فلا نامت اعين الجبناء


    *وجمال ابو عنجة مطالب بالفوز


    *فاروق جبرة زاتو مطالب بالفوز


    *ما تصدقوا فورة الصابون ديك


    *ديل عندهم الصفر الدولى الكبير


    *يعنى مجمدين


    *ونحن متصدرين


    *الشغل بقى محلى


    *لو جمدونا نحن مخزنين البكفينا


    *عندنا سنام


    *ما كنا نيام نيام


    *فى المحلى صدارة


    *وفى الخارجى كراع فوق كراع ومعاها سيجارة


    *يعنى كما تقول الحكمة


    (العفش فى البص على مسؤلية صاحبه)


    * اقول ليكم حاجة: الهلال الليلة مغلوب مغلوب


    *بى كم ؟.... ما متاكد


    *وجزيرة الفيل عندنا فيها امل


    *فاروق جبرة قالوا سيئ السلوك


    *ليه داقى امو


    *على العموم نحن فى الصدارة


    *وعليها سنحافظ


    *وده عشم


    *والمريخ عشم


    *الجمهور عندوا حق لو احجم


    *ولو حضر بكثافة فالحق عندو


    *وسر المحبة للمريخ ما بنفشيه


    *لو لعب لنا صدام وخليفة والتعاون لشجعناه


    *ما تصدقوا درقة الرغوة


    *درقة الرغوة مرقتا للهبوب تتقدد


    *الا ظروفنا قست علينا


    *خرج القطار عن قضبانه


    * ورجعناه


    *الترلات وراهو تتخابط


    *اشى درجة تانية


    *واشى درجة تالتة


    *وفى مسطحين


    *الما عارف المريخ مسطح


    *ايه رايكم نفتح صفحة جديدة الليلة


    بدون اغفال الصفحة الفاتت


    *لن نغير لاعبا هذا الموسم


    *ونوطن النفس على ذلك


    *نحاول ان نتحوط


    *ناخذ حذرنا


    *نرضى بى قدرنا


    *والمريخ بجمهوره قبل لاعبيه



    *الدوس هكسى الاديب الانجليزى الشهير له رواية اسمها (عالم رائع جديد) يتخيل فيها ما سوف يحدث فى المستقبل اوبعد ستة قرون ... تخيل ان القيم الانسانية ستختفى بل وسوف تصبح من الرذائل الممقوتة ... وستتغير المشاعر الانسانية والنظم الاجتماعية وسيتحدد للبشر طرق تفكيرهم بحيث تتلاشى الارادات الفردية والافكار الخاصة بشخصية الفرد


    بالمناسبة السيد هكسلى توفى 1963 ..... اى لم يقرأ بعض الصحف الرياضية التى تحقق نبوءته فى اقل زمن؟!


    يرغب نادى المريخ للتربية البدنية عن حوجته الملحة لشاب دون الثلاثين من عمره يجيد وضع الكرات السهلة فى المرمى على ان تكون له معرفة كافية بماجد وكمال عبد الوهاب وسانتو وزيكو



    *مخرج لهاشم صديق


    بعض صحف الارض تطبع


    ذات ليل


    ثم تقبع


    فى انتظار الفجر


    يطلع


    كى نطالع


    تحت ضوء الشمس


    بعضا من سخافة



    تكريم جمال الوالى سيكون بالاتى


    (الاستعداد لعودته فى نوفمبر القادم.......... وسيعود)

    mor99973@hotmail.co
    [/frame]

  2.  
     
  3. #12
    إعلامي مريخي
    رقم العضوية : 1718
    تاريخ التسجيل : Jan 2010
    المشاركات: 252
    التقييم: 50
    معدل تقييم المستوى
    49

    افتراضي من هنا وهناك

    [frame="10 10"]
    حققنا المهم



    *من سعى فى طلب العلم فهو جاهل


    *ومن ترك السعى فى طلب العلم فهو جاهل


    (ابن عربى)


    *غايتو نحن عندنا جنس صدارة


    نحن صدارين خلاص


    نحن القطر


    نحن الخطر


    والورانا ترلة


    ترلة لا راحت لاجات


    الواحد فيكم لما يطلع كبرى الحرية يعاين


    فى كم ترلة


    شفتوا ليكم ترلة اتحركت لو ما وقف قطر وجراها


    وجرا هذا السيل


    حصل شدة حيل


    وراجى رجيناه


    وادانا الاشارة


    ثلاثية ضربت اللون


    لكن شخصيا كنت خايف من الكرنوس


    والله خايف


    مش ياهو ده الكرنوس العمل للجماعة باى نق تربيع


    جماعتكم عندهم لاعب اسمو جمعة


    اتاريهم طوالى فى اجازة وانا اقول ليييييه


    بالطريقة دى فى المجموعات بتعملوا لينا جمعة


    وجمعة ده قطعة ارضو وين؟


    لكن العجب ده حاجة عجب


    انتوا ده اسمو ولا من فعايلو


    ابوعنجة ماشى صاح


    لو قلع نظارتو دى بعوق ليهو زول


    والمهم تحقق


    صدارة


    اولية


    *عليك الله ما بتبالغ يا بابور


    كنت انت والقون


    والموضوع درون


    لكن كابس طلع كابس جد


    مخو كابس


    وينو الفريق البغلبو


    وماشى وجاى


    الاسماعيلى هو


    ........................


    لازال دفاع المريخ يحتاج الى الكثير


    ولو واجه هجوما متصلا لما سلم المرمى



    لكن المهم اتحقق


    ثلاثة نقاط


    ثلاثة اهداف


    ثلاثة دقائق زمن بدل ضائع


    والله الواحد لامن قال مدربنا مازدا



    ...........................................


    فيصل العجب هو النجم للمباراة


    وكونها جات للشغيل ما بطال


    بس خايفنو يصدق


    ما زمان طلع نجم لمباراة قمة


    نام التقول عاضاهو


    التسى تسى


    ..................................


    انتوا المعلق بتاع تلفزيون السودان ده حاتكون دى طريقتو حتى فى رمضان


    وبمناسبة رمضان


    بالطريقة دى حا يلعب عديل


    واحتمال يغنى


    زكرنى لما كنا صغار


    الواحد العندو كورة ما بتغير


    واى فاول بشوتو


    ولو نادوه للفطور معناها المباراة انتهت


    ................................................


    المريخ لاعب


    والهلال لاعب


    والبحث عن هدف شغال


    ده زكرنى برامج الفضائيات


    فى زمن اغانى واغانى


    .........................................


    الفيفا جات


    اجيزوا المادات


    هسى بترجع


    ........................................


    ونحن فى الصدارة


    ماتسمعوا نحن الممثل الاوحد للسودان


    ما على مهدى الممثل الاوحد برضو


    غير انو هباش عمل شنوز؟؟؟؟؟؟؟؟؟


    ......................................


    سيعود الوالى للمريخ


    والارباب للهلال


    ومعتصم رئيسا للاتحاد


    والهلال للدورى المحلى


    ...............................


    سنكتب قريبا (العرجاء لمراحها)


    راعى الضان فى الخلا يعلم ذلك
    [/frame]

  4.  
     
  5. #13
    إعلامي مريخي
    رقم العضوية : 1718
    تاريخ التسجيل : Jan 2010
    المشاركات: 252
    التقييم: 50
    معدل تقييم المستوى
    49

    افتراضي من هنا وهناك

    [frame="10 10"]
    هوى اسبابى الخبير الطاااهر



    دو.. رو ... مى...فا...سو...لا...تى


    ...................................


    *الخبير الطاهر قال : ان ارتداد الكرة من الخشبات الى منفذها تستحق الاعادة


    الموضوع ضربة الجزاء طبعا


    ضربة الجزاء غير صحيحة


    وطارت


    ورجعت قون غير صحيح


    والحل القانونى هو


    اعادة المباراة


    فى مسماها


    اسوة بمباراة نيل الحصاحيصا


    (يمهل ولا يهمل)


    نعرف ان الجماعة سيقاتلون لعدم الاعادة


    كما قاتلوا للاعارة


    وسعوا للاعاقة


    وعجزوا عن الاعاشة


    لكن القانون واضح وجلى و.......مهلبية


    المباراة تعاد


    ولو انت راضى بان تعاد


    ليه بتحكى الزكريات


    المباراة معادة


    القانون بقول كده


    كده كده يالترلة


    البابور داير يدور


    المباراة يوم الخميس والحارس جمعة


    اهو ده سبب تانى للاعادة


    وفى الاعادة افادة


    وسعادة


    يلا لى مدنى ياشباب مدنى


    غنوا اغنية خواطر فيل


    اعادونى ليه ليه


    انا ما عملت هناك شى غير التمثيل والشيطنة


    ما التمثيل ده يا ود امى اللى اعادها


    *الجماعة اعد ما مفارقاهم


    *اعيدوا الارباب طيب


    *سيعود متزامنا مع اعادة مباراة الافيال


    *الخبير الطاهر قال تعاد


    وانحياز التحكيم الظاهر


    *قال تعاد فقلبى اليوم متبول


    *يعنى الفرحة بعد المباراة مؤجلة


    *ارجوكم....اى جمعة حزن لا


    *جزيرة شنو البتخوف فريق الاحلام


    *الاعارو لاعب لناد ما شافو


    من جبرة ما بخافوا


    *ياخوانا ديل لو اعادوا ليهم مباراة الترجى فى رادس عندهم ولا حاجة


    *الركب التونسية ما بخوفوه بالبابور


    *واحتمال


    يتجمدوا داخلى برضو


    *جنهم جن الاعادة وهم فايزين


    *وخالد عبد الرحمن ده ما عارف والا صغير والا هرشونا


    بابا يغسل العدة


    *جزيرة الفيل دى زى الحزن النبيل


    (ما اصلو حال الدنيا


    تسرق منية فى لحظة عشم)


    ندمان انا


    ااااى حرّم وسافى التراب


    *كان مفروض تعيدها يا خالد


    *لكن الاتحاد حايعيدها


    *هى والانتخابات


    *يفوز معتصم والجزيرة


    *المباراة المعادة تحت عنوان (كتلة) الاوسط



    >>>>>>>>>>>>>>>>>>>>>>>>>>>>>


    والمسيرة اليوم لجمال الوالى تؤكد صفوية جماهير المريخ


    *تبين اننا امة من الوفاء مجبولة


    *وشكرا مفصلة على الذى فصل على المريخ


    *واعادنا الى فصول محو الاتكالية لنتعلم كيف ننفق على من نحب


    *لقد ترك اثرا


    مثل نبش اسماعيل فى القفر السحيق


    * ايها الرجل المحبوب


    سيجيئك اليوم احبابك


    *ناس سيرة


    *جابوا الاحترام مزفوفا اليك


    *بواريهم بتوريهم


    *راياتهم واضحة كرايهم فيك


    ولو ايديهم فيك


    من المسك تتملّخ


    السما ينتكى


    وجلد النمل يتسلخ



    *لا خوف البتة من اعادة الانتخابات


    *اعيدوها اصلوا نحن فزنا بركلة جزاء ظالمة


    *اجتحنا اجتياحا


    *وارتحنا ارتياحا


    *ويمكن لشداد والارباب ان يقتسما ال20 صوت


    *كل واحد عشرة


    عشان العشرة(بضم العين)


    * وعشان جبرة زاتها



    بالمناسبة انا احب الرسائل فى موبايلى من الاحباب


    تلك الجميلة ناصحة او ناطحة


    ولا اابه للسفيهة


    *اتمنى ان تكون الرسالة قد وصلت



    ومع جمال ابوعنجة يبقى الحلم مشروعا


    وتبقى المؤازرة فرض عين


    وقد كان التنظيم مختلا


    وجمال رصاص



    انتظار الجمعية العمومية لنادى المريخ يجب انتظارها ومجموعة كبيرة تحمل عضوية النادى الرائد


    ولابد من اختيار من يحبون المريخ باكثر من الاضواء


    ونودع تمامة الجرتق


    قد تجدون التفاصيل عند السراج!!


    ومع المريخ

    الماضى والان والقادم اجمل
    [/frame]

  6.  
     
  7. #14
    إعلامي مريخي
    رقم العضوية : 1718
    تاريخ التسجيل : Jan 2010
    المشاركات: 252
    التقييم: 50
    معدل تقييم المستوى
    49

    افتراضي من هنا وهناك

    [frame="4 10"]
    دى الاعارة



    اتغيرت واتبدلت


    وشك بقى ما مألوف


    لونك بقى ما معروف


    امال كيف دواخلك


    ..........................(......)


    * هل ستعاد الانتخابات؟


    *هل سيعود معتصم رئيسا؟


    *هل سيعود شداد مسيطرا.


    *هل سيعود الوالى الى المريخ؟


    *هل سيعود الارباب الى الهلال؟


    *هل ستعاد مباراة صيد البلد والافيال؟*


    *دى الاعادة والمقدر ما بنشوف ليه بديل


    *ارجع تعال عود ليا


    *باكر يعود القاش ترجع عيونو حنان


    *رجعنالك


    *لو عايز الزمان يرجع


    *قول للزمان ارجع يا زمان


    *لما ترجع بالسلامة


    *وترجع ايامنا الجميلة


    *الليلة راجع لى تبقبق


    تنتل الاهة وترقرق


    زى تقول يا داب عرفت الاندهاش


    *اى حاجة عندنا معادة


    *وبتعادى


    *وضجة فى رادى


    *وخطب حماسية


    *بنحب حركة وراء شديد


    *عشان كده اصدق اغنية عندنا هى:


    ورا ورا ورا


    *رغم انفنا والترابة الفى خشمنا


    *واى زول تلقاه فى امتحان الرخصة للقيادة


    *خايف من الخلف


    *وفى ناس بطلعوها من الولايات لهذا السبب


    *عشان كده سواقتنا زى الزفت


    *بنحب الماضى بشكل مرضى


    *بنموت فى الاحاجي والتاريخ


    *فاطنة السمحة عندنا احلى من ياسمين عبد العزيز


    *منو الشاف فاطنة السمحة؟؟؟


    *ولم نتقدم الا فى الساعة


    *ساعتك مقدمة يا ابو الشباب!


    *فى ناس من حب الاعاد\ة قالوا


    *اريت الانجليز لو ما طلعوا


    *تطلع روحكم


    *هل غيرنا يحب الاستعمار


    *والفيفا عرفنا بنحب الاعادة


    *فقال نعيد ليهم الانتخابات


    *لو تصدقوا


    *نحن بنطلع من الاستاد جرى


    *علشان نحضر اعادة الاهداف


    *فى التلفزيون


    *الاهداف الحضرناها فيس تو شبكة


    *وبنحب ليلى وفيس


    *اكتر من القيس بوك


    *اى زول داير يحضر العيد فى البلد


    *عشان يعيد زمان


    *وسرا ننادى القمرة


    اقلبى السنسنة الحمراء


    شوفيهو لايه ما جاء


    *النقر ولا شنو!


    *حتى فى اعلانات المدارس


    هناك فصول للاعادة مكيفة


    *وفى ناس لما دايرين يرشحوا مدرب للمريخ بدل كاربونى قالوا نعيد كروجر


    *جمال ابو عنجة اول حاجة اعاد 3..5..2


    *نحن امة تحب البايت


    *والدايت


    *والفايت


    *ارجع ياوالى


    *ارجع يا موسى


    *وكل يوم نرزل


    *من منكم _بصراحة_ سأل من نتيجة منتخب الشباب


    *رغم ان الامر متعلق بسمعة وطن


    *واول مطالبنا عند فوز معتصم


    *اعد لنا جهاز الاشبال


    *وعقبال عودة الشبال


    *اختفى من الاعراس


    *استعضنا عنه بالروسية


    *والزفة المصرية


    *حتى ان برنامج اغانى واغانى


    *المفضل لدى الجميع


    *فلان السر قدور يجتر الزكريات


    *ويغنون لنا غناء الامس


    *ثم ضاع الامس منا


    *وانطوت فى القلب حسرة


    *اعيدوا كل شى الى مكانه الاول


    *جيبوا شداد للاتحاد


    *وهاتو سيد سليم ليدرب المريخ


    * نحب امة تموت فى الابيض واسود


    *بنحب البادنجان بشكل جنونى


    *وعشان كده قالوا قالوا على شقى ومجنون


    *نانسى تغنى لجدها الكحلاوى


    *وناموسيتكم كحلى باذن الله
    [/frame]

  8.  
     
  9. #15
    إعلامي مريخي
    رقم العضوية : 1718
    تاريخ التسجيل : Jan 2010
    المشاركات: 252
    التقييم: 50
    معدل تقييم المستوى
    49

    افتراضي من هنا وهناك

    [frame="4 10"]
    حصان الفيفا.... طروادة سابقا



    *فى الاساطير الاغريقية ان طروادة كانت مدينة منيعة زات اسوار شامخة وشاهقة وكان فارسها وولى عهدها الامير هيكتور يضرب به المثل فى النبل والاقدام والشجاعة


    وجاء الغزاة الى طروادة بقيادة اخيليوس وهو فتى مقداما وقاتلا شريرا قالوا ان والدته قد امسكت بكعب قدمه اليمنى وهو صغير لتغمسه فى ماء مقدس فشب اخيل فارسا كاملا لا نقطة ضعف له الا كعب قدمه...كان السيف لايجرى فى عنقه,, والرمح يرتد من صدره,, ولا تقدر عليه السهام...


    طروادة المنيعة كانت تصد الغزاة باعتصامها داخل اسوارها


    فكانت بعيدة عن كل مطمع حتى جاءها اخيل وطال الحصار على طروادة


    طال الحصار على محاصرى طروادة


    واصبح صبح نظر فيه الطرواديون من على اسوارهم فلم يجدوا المحاصرين... ذهب الغزاة الى بلادهم لعل


    لكن ماهذا الذى تركوه خلفهم؟


    ماهذا الحصان العجيب


    *طول قلعة ومساحتها ويمشى على ارجل خشبية


    *قال بعضهم احرقوه


    *وقال اخرون بل ندخله مدينتا ليكون زكرى وتزكار


    *ودخل الحصان المفخخ الى طروادة


    *وفى ليل بهيم خرج الغزاة من تجويف الحصان


    *وفتحوا الابواب للباقين


    *واستبيحت طروادة


    *احرقت


    *قتل فرسانها


    *واستعبدت النساء والاطفال


    *لكن اخيل لم يحتفل بالنصر


    *جاءه سهم فى كعبه فالحقه القتلى الذين قتل


    *وهاهو اخيل الجديد


    *اخيل حامد شداد


    *جاء بحصان الفيفا الى مبانى الاتحاد العام التى تحصنت منه


    *جاء خرمانا الى كرسيه كما يليق بديكتاتور متمرس


    *وضع رجلا على رجل بعد ان خرج من الحصان الفيفاوى


    *لكن نقطة ضعفه بانت


    *ومقتله تجلى


    *حب الرئاسة والكرسى


    *وبالانتخاب سيكون ابعاده


    *قالوا له كما يقول والد العريس لطالبها المرفوض


    :بتى قالت دايرة تقرأ


    *فان قال الرجل بستناها


    *قالوا له لماضتئذ: قالت ما دايراك عديل


    *عسى ان تكرهوا شيئا وهو خير لكم


    *سنتخلص من اخيل القرن ال21 بنقطة ضعفه


    *بقولة مادايرنك


    *كفاية


    *انت ما بتشبع


    *وهاهو معتصم جعفر قد اثبت حنكته


    *وقوميته


    *طالب بمهلة حتى يتسنى للهلال ان يلعب مباراتيه امام الاتحاد الليبى والجيش النيجرى


    *وعلى الذين يكتبون عن مريخيته واستقصاده للهلال ان يتقوا الله


    *لكنى ارى انكساف شداد


    *فليودع كرسيه للخروج النهائي


    *لقد جاء الى مكاتب الاتحاد متشفيا


    *وسيغادره مستشفيا


    *فان حب المناصب مرض عضال


    *واقتربت الفطامة


    *اتم دورتين كاملتين


    *غرز الشطر ولا زال به يتشبث


    *وان لنا ان نضع شطة على الحلمة


    *وان نعطيه سيرلاكس العوض


    *ايها الاخوة فى الجمعية العمومية


    *امامكم مهمة تاريخية


    *لا تدخلوا الحصان الخشبى الينا


    *فان الفيفا بها لوبى من اصدقاء


    *ليس لها العدل المطلق كما يليق بكل تنظيم غربى


    *وليس لها القلب على احد


    *والدلائل كثيرة وكسيرة


    *اسقطوه بذات سلاحه الذى به يهدد


    *نريده ان ينال خمسة اصوات فقط


    *هى عدد الباصمين له بلا روية


    *عدد الباسمين له بلا مناسبة


    *ورقم السدنة الذين يرونه العالم الاكبر


    *حواء والدة


    *وحبوب المنع التى تدس لها بالدسائس لن تمنع رحمها من احتضان قائد جديد


    *ان تدخل الفيفا لخير


    *وسنغنى : بلاء وانجلى


    *ولن ننسى لشداد انه من جاء بحصان الفيفا الى طروادة الحصينة


    *نحن واعيين فقط ساعدونا يا اعضاء الجمعية العمومية


    *انتم من عليكم الرك


    *لنودع حكم اليك
    [/frame]

  10.  
     
  11. #16
    إعلامي مريخي
    رقم العضوية : 1718
    تاريخ التسجيل : Jan 2010
    المشاركات: 252
    التقييم: 50
    معدل تقييم المستوى
    49

    افتراضي من هنا وهناك

    [frame="4 10"]
    لعل اولى هنات المباراة التى جرت امس هو خطل التنظيم



    352


    تنظيم شين


    اوردنا المهالك غير قليل


    المريخ ظهرت بعض محاسنه


    ولاحت كل عيوبه


    التونسيون اعطوه اضافة


    والفلسطينى جعله قيافة


    الان يمكن ان نقول وداعا للخوف من الحراسة


    الله يطمنا على الدفاع


    ناس عدم التغطية


    اسهل هجمة تدخل


    وندخل نحن فى كستبانة


    *ولكن لاح امل


    بريق غائص


    واعتقد ان المريخ سينال الدورى


    اخر ما تبقى لنا


    فقط لا للتجريب


    ولا للاتكالية


    لن نستطيع ان نحكم على كورة امس


    لانها كانت فى منتصف الملعب


    ولكن المريخ كان متجليا


    من (جلى)


    توفيق ارسل يقول واااااااا مريخاه


    ليه يا تيفة.... اصلو الاتحاد الليبى


    واتارينى اقول ليه اى زول ماشى ليبيا معار


    *ما عندهم التكتح


    عليكم الله ده فريق ينافس


    *ونرجع لابى عنجة


    *ما بحب الاهداف ولا الهدافين


    *بنفع مع كروجر


    *شبهينا واتلاقينا


    *تخندق حتى قلنا ليته هاجم




    * غدا نتحدث بعون الله عن المريخ العايزنو للجاى


    *قطع شك ما بشبه مريخ امس


    *لكن يا الشغيل بالغت عديل


    *ما بنتكلم عن البيضة


    *عن الهدف الاكيد الضيعتو


    *عن شلاليتك


    *وبرضو احسن من سعيد السعودى


    والسعودى احسن من لاسانا


    *هيثم مرابط مثل بدر الدين بخيت


    *شوف لينا واحد زيك يا ابوعنجة


    *والا نشوف لينا بارشا نشجعها


    *مع انو سبب زعلنا ما من مباراة امس الاول


    *بل من مباراة التيحا


    *مفروض الهلال كان يغلب اكتر من كده.....................


    *انا زعلان من الهلال ليه وقت لقاها سايبة ما ضرا عيشو


    *ها ها ها هو عندو عيش


    *بشة ما شال قروشو ويجيب فى القينان.... حراق روح ساااى


    *الوصل الاول


    *مرشده طارق مختار


    *والله لو عندى زى راسك ده اكان احتل خط تمنتاشر براى


    *فالح للجوز مع الخط


    * مرة كنت فى الاستاد


    *واحد صاحبى بره ...لسه ما دخل


    *قال لى الكورة بدأت والا لسه


    *قلت ليه لسه...الفريق بيسخن


    *قال لى اها وهسى كم كم


    *قلت ليه لسه صفر صفر


    *ما ممكن المريخ يجى فيه قون قبل المباراة


    *يعنى الفرق بينها وبين القون فى اول دقيقة شنو؟


    *الله يجازى محنك يا سفارى


    *شمتوا فينا الزمن بدل الضائع


    *مفروض تانى المباراة تبدأ الدقيقة 10


    *لكن موضوع ليبيا ده عامل لى تونس فى راسى


    *ده تيحا والا فضيحة


    *ولابسين لى احمر كامل


    *يكمل بنزينكم


    *الغلبوكم ديل جياع


    *الصايمين ديمة


    *والا بيكون افطروا تمنتاشر مسكينا


    *التيحا القبيحة


    *ما عافى ليهم


    *دفقوا لى املى المليان


    *بعد ما مثلوا لى الورع تقيان


    *..................


    *الظاهر على انا فاطى سطر تااااانى


    *والله لو ما شماتة ابلة ظاظا اكان اقول ليكم البرنس هيثم ده لعاب شديد


    *قارنتو ببرة جابر


    *قستو على موسى


    * وللذين يؤملون خيرا فى كروجر الا يتفألوا شديد


    *فبعض لاعبى المريخ لا يشبهونه


    *ولقد قالت العرب قديما


    عطر القبيحة لايزيل فساها


    * اخاف ان اقول بعد مباراة الاهلى ..اه ... لى


    *ولكم


    *قوموا على تسجيلاتكم


    *وارغو... يا ود يا وارغو.... انت مكانك الريال


    *حقك ريال


    * جريت ريالتنا
    [/frame]

  12.  
     
  13. #17
    إعلامي مريخي
    رقم العضوية : 1718
    تاريخ التسجيل : Jan 2010
    المشاركات: 252
    التقييم: 50
    معدل تقييم المستوى
    49

    افتراضي من هنا وهناك

    [frame="4 10"]
    *قالوا لايوب: جفاك الاله!



    فقال لا يجفو


    من شدّ بالايمان....لاقبضتاه


    ترخى ولا اجفانه تغفو)


    بدر شاكر السياب


    *هبّ المريخ من سباته...نفض نعاسه.. وصحصح... فاصابت القوم رعشة واعترابهم اضطراب


    ما صدقوا ان طائر النار قام من رماده سمندلا وبعض مستحيل


    ومع النيل فاض .. ولازالت منابعه تجود... له مدخور الوطن ومنه الخير ابدا.. واحدا صحيحا والخصب الاوحد وبجواره تمدد البور


    لم نيأس منه ولن .. لان ما ثبته فى القلب جزور غاصت حتى بلغت الحشاشات واحتلت البصائر


    وبعودته نحتفل فعودة مثله مما يضرب لها النحاس وترهن لها النفائس


    * وهاهو قد حمحم ليكر فالمريخ خيل معقود بناصيته الخير منذ ان انتخبناه ففزنا وانتخبنا فنجحنا


    *شمس شروقها مرجوء.. وليله ساعة اوبعض ساعة


    عاد المريخ من ارض زائد...وجاءنا بحرا زائد...وطامح فعلى جيرانه اخذ الحيطة والحذر


    له الزعامة اذ بحقها قام .. دخل احراشا وقاتل ابطالا اوكما قال على المك يوصف البروفسير عبدالله الطيب: كان يقطع النيل سباحة ابيضه وازرقه وان يلتقيان وحين كان يلعب الكونكان 14 لم يكن اقرانه يعرفون من السيجة الا هوهوى كلابها


    وكذا المريخ مذ ان تحزم وتلزم وجعل له عنوانا فى جبهة الشمس


    الــــولد البرضــــــــي النيــــه مو نوام


    حقب قربينـــه فوق ضهــــر المسري وقام



    اندمــــرن سروجــــو وكملـن الايام



    وتشلـــــع ستـــــار القبلــة من قِدّام




    وحوله نلتف لا علينا بالعازل ولو ضربلو طبول..فما تعافى هذا المليك المفدى الا وزارت العافية كل الوطن ..وطن المريخ بلا اقصاء للاخرين وبلا ربطهم به حتى يدفعوا مهر الاقتران


    *ولو كنينا السودان بابى المريخ ما تجاوزنا الحقيقة فهو بكره وهو سنده والوحيد الذى حاكى الوالد...فشبهه خلقا وخلقة


    والى سوح المريخ دخلنا ودخنا من عطر صندله ونسائم العطر الاخاذ... غفرنا كل الماضى ..لان الغفران هو ما نملكه للاحمر العزيز ..عزة ما بتعرف ركوع... غسلنا الاصباغ التى شوهت وجهك الجميع.. ولقد راينا الوسامة المغيبة....وعزفنا باوتار العروق نشيد هواك... يا انت يا شرك الهلاك....


    وجسرنا ما بيننا والمستحيل بجسر من فولاز وكبارى العشم فيك ولتعربد الامواه من تحتنا او تتمدد اللجج


    *بينى وبينك تستبين مخالبى


    وتسيل من شدقى الدماء


    وحش انا..غول خرافى العواء


    تحوى توابيتى دقيق الموت


    تزحف من سراديبى ثعابين الشتاء


    سبرى...عجين السدر


    سن الحوت


    هيكل مومياء


    بينى وبينك ما يراه الناس


    سروة شاطئ ناء وزهرة كستناء


    تتلاصفان على الرمال فتزهل الدنيا


    وترتعش الحقول


    *ايها الناس بثوا ضمائركم ...فكلنا عشاق
    [/frame]

  14.  
     
  15. #18
    إعلامي مريخي
    رقم العضوية : 1718
    تاريخ التسجيل : Jan 2010
    المشاركات: 252
    التقييم: 50
    معدل تقييم المستوى
    49

    افتراضي من هنا وهناك

    [frame="10 10"]
    طريق



    انا اصلو خان عشقى الوعى


    وقتل ملامح طلعتك كتر النعى


    اشرت ليك........ ما تطلعى


    (هاشم صديق)


    *الفتى كان يحب (تماضر) حبا جما


    *بقى لاصاحبه شاعر


    *فتيل الريحة بكملو فى بخة واحدة


    *اغترب وعاد بسيارة


    *اصبحت كريسدته مثل كيوبد(الهة الحب عند اليونان)


    *توارى اسمه الاصلى واصبح الناس يسمونه(محبة)


    *كان اسمه الطاهر


    *بعد شوية اسموه الطاهر محبة


    *بعد داك بقى محبة بس


    *الكريسيدا مكتوب عليها حرف(تى)


    * ادمن مشاهدة الافلام الهندية حتى لبس نظارة


    *اقل حاجة اصبحت بتبكيه


    *الدكتور حرم عليه البهارات واغنيات هاشم ميرغنى


    *والابتعاد التام عن اغانى الطيب عبد الله


    *مرة زرناه فى المستشفى


    *ماللك يا محبة؟.. وكفارة


    *طلع منديلو المرسوم فيه سهم وقلب وحرف تماضر وقشى دموعو وقال:


    والله ما عارف الحصل شنو...كنت داير اسمع اخبار عشرة فى الرادى


    *قبل الاخبار جابوا اغنية عشان اهلك بخليك لهاشم ميرغنى


    *بس... لقيت نفسى هنا


    *عشان اهلك بخليك


    اشيل فى جرحى ماضيكى


    احاول وبرضى ما قادر


    عشان انسى وانسيكى


    غريبة الدمعة فوق عينيك


    تشوفينى وتخبيها


    تخافى علىّ اشيل همك


    عيونك تحكى بالفيها


    وقدر ما يقولوا ليك عنى


    عشان ريدتنا تنسيها


    تدارى الاهة بالبسمة


    وريدتك لى تزيدها


    ودايما ده المبكيكى


    *وانخرط محبة فى نوبة بكاء هيستيرية


    *المهم تجاوز صديقنا ذلك الموقف


    *لكن الطبيب استدعانا_نحن اصدقاءه_


    *وصارحنا ان صاحبنا لولم يتخلص من هذه الحنية الزايدة


    *والمحبة الشديدة انا انا...فان عاقبته القبر


    *واعطانا العلاج.... وهو ان يتقدم لتماضر


    *ولكن قبل ذلك علينا ان نعطيه احتمال ان ترفضه او يرفضه اهلها


    *يعنى مايأمل انه سيرفع كاس الزوج كده طوالى ويفكر فى سوبر البنين والبنات


    *واصبحنا ندرج (محبة) على الصمود


    *جبنا ليه اغنية يا فتاتى


    يا فتاتى ما للهوى بلد


    كل قلب بالحب يبترد


    *وبكى لامن الله غفر ليه..


    *خليناه يجعر ونحن نلعب فى كوتشينتنا


    *اليوم التانى جبنا ليه (فات الاوان)


    الله لقلبى الاحترق يوم انفتح


    للجنة باب


    الله لشمعاتى الانطفن


    يوم الضلام بالفرحة ذاب


    الله لعمرى الانتهى


    يوم ابتديت احسب حساب


    *وعلى كده


    *لحدى ما سمعناه يوم (فى الليلة ديك)


    و(حان الزفاف) فى يوم واحد


    جيت اهنيك واصافحك


    جيت اقول مبروك عليك


    ...............


    جونى الصحاب انا قالوا لى


    شفناها فى توب الزفاف


    مش عاد حرام ساكن الضفاف


    ينشر فى عمرو الجفاف


    طولى عمرى بزرع فى الورود


    وحصادى شوك اخر المطاقف


    * صاحبنا دموعو رابن بس


    *عرفنا انه قلبو قوى ووجهناه يمشى براه لبيت ناس تماضر ويطلبها تمهيديا


    *وفى اليوم الموعود انتظرناه حتى منتصف الليل


    *وحين لم يات ذهبنا لبيت ناس تماضر زفت دى فعلمنا انه قد تم رفضه........ من عصرا دورى اربعة


    *وبحثنا عنه فى كل مكان ..مستشفيات...سجون... مشارح... لاحس ولا خبر


    *فكرنا نمشى ليه ابو ظبى ... يمكن يكون سافر


    *وانبنا انفسنا لدرجة ان تعاركنا مع بعض..... وحين عودتنا الى المنزل الذى نلتقى فيه وجدناه متحكرا يغسل فى قميص


    *نططنا من الفرح


    *واخبرناه بما حصل واننا عرفنا النتيجة ........... ثم سألناه عن ردة فعله بعد سماع الرفض

    *فابتسم صانعا الصمود والكبرياء وقال:

    عادى جدا ما عملت اى حاجة.... ركبت نظارتى ولبست عربيتى واتخارجت........................
    [/frame]

  16.  
     
  17. #19
    إعلامي مريخي
    رقم العضوية : 1718
    تاريخ التسجيل : Jan 2010
    المشاركات: 252
    التقييم: 50
    معدل تقييم المستوى
    49

    افتراضي من هنا وهناك

    [frame="3 10"]
    عافية المنتخب................. ومرض الهلال



    يا صندل الليل المضاء


    لو زندها احتمل الندى


    لكسوت زندك ماتشاء


    ثوبا من العشب الطرى


    وابرتين من العبير


    وخيط ماء


    (مصطفى سند)


    * وكما اعطى استاذنا احمد محمد الحسن نوط الاداب والفنون من رئاسة الجمهورية لاسهاماته غير المنكورة فى مجال الصحافة الرياضية متجاوزا كل الزملاء له من التخصصات الصحافية الاخرى فكسونا معه بالفخر... نتمنى ان يعمل العاملون لاجل اعطاء مدرب المنتخب محمد عبد الله مازدا نوطا وتكريما ليس لاجل المباراة الماضية ولكن لاخراجه لنا من حفرة مكثنا بداخلها لاثنين وثلاثين عاما فصعد بنا الى نهائيات غانا الماضية... ثم حمل لنا كاس وسط وشرق افريقيا بعد غياب ربع قرن وهاهو قد نفخ انفاسه فى شراع مركب كانت لاتغادر المرافى ولا تترك المشارع ولا تفوت مرساها


    ولن نقول ان فخرنا به لانه مريخى كما لم نفرح بتكريم الاستاذ احمد لمريخيته ولم نهلل لاختيار السيدة ليلى خالد عضوا بالاتحاد العام لمريخيتها ... فاننا نعف عند المغنم ولو افتخرنا لكان حق لنا... لكن التى للوطن وللعام لاتجزأ لانها انذاك تفقد معناها تماما كما كتب ناس خالد عز الدين ومن لبس شعار الهلال فوق قميص الوطن..


    ان الذى ارسل مشرط البتر الى جزء من الوطن هو هذه الانا الفارغة فوق زات البلد وان الذى جعلنا تحت رحمة العواصف والانواء هو هذا الغبن الجزئي على الجماعية وسبق ان كتبت هنا اوهناك فى منابر اعلامية سياسية عن (نشيج الوطن) لا نشيده وضربت الامثال ... ان الذى يجعل انفصال الجنوب امرا متوقعا ونهاية طبيعية انه حين تمت مراسم جنازة قرنق امتدت ايادى لتدثر التابوت بعلم الحركة الشعبية مبعدة علم السودان... ولقد غطوا جنازة الهندى بعلم الاتحادى وجنازة عمر نور الدائم براية حزب الامة وعلى ذلك قس


    لكن الذين يحتشدون فى الاستادات لمشاهدة ومؤازرة المنتخبات الوطنية لاياتون الا لينتصر الذين يلعبون باسم الوطن ولقد احرز مسعود اوزيل هدفا فى منتخب تركيا فهل صفق له الاتراك


    لقد شجعنا_خالد معانا_ منتخب غانا هذا نفسه فى المونديال لان ما جمعنا به افريقيا بكل اتساعها ورقعها وترقيعها لم ننسبه الا لافريقيا فلماذا ينسب نصر السودان الى جهة


    فهل لو خرج الهلال قبل البطولة الكونفدرالية سنكتب ونقول نخاف على المنتخب من مرض الهلال كما كتب خالد عن عافية الهلال فى جسد المنتخب


    دعها فهى منتنة........ وما كان لى ان اكتب ردا مباشرا لولا اثر كلمات الاخ خالد فى الشارع الرياضى من غضب ومن تاييد


    دعونا نبعد المريخ والهلال عن المنتخب.... وبعيدا عنه تبقى الشماتات والافتخار... السخرية .. والكبرياء متاحة حتى على نطاق الخارج حيث البرالمة والسناير


    * ولقد دخلنا مدارسا فوجدنا تزكارات من سبقنا


    *ولقد دخلنا فصولا فوجدنا كتابات من خلفناهم


    وحتى فى مدرجات الجامعات كانت لوحات الشرف تحمل اسماء من غيرنا كانوا قبلنا


    فاذا مانال الهلال هذه الكاس التى يموت شوقا لها فانه سيجد اسم السيد المريخ معلقا قبله فى (بورد)الشرف واولا فى تسلسل النتيجة؟


    لقد انتصر السودان بالتعادل لان (مواطنيه) قدروا المسؤلية يريدون ان يدفعوا ولو واحد بالمائة من الذى يدفعه اخوانهم فى الثغور... يخرج الرجل من بيته عريسا ويعود اليه يحمل طفله عنه حقيبته..... لم يؤدى الا الواجب والشرف ... ولا يرى صورته فى الصحف ولاينال حافزا بل ولربما جاء لان مرتبه لم يدفع لاولاده لسبب من الاسباب


    *لقد سبق وان فاز مازدا مع المنتخب بسيكافا وكان لاعبو الهلال اغلبية فهل رفع الهلال كاس سيكافا.... هل فاز بوصافتها حتى... فى حين ان مازدا فاز بسيكافا ... ونال الكونفدرالية بمسماها القديم


    وهل دوجاليبا المالى اقوى من منتخب غانا بحسبان ان اخر مباراة خارجية انهزم فيها الهلال من المالى بهدفين...


    امس الاول افتخرنا بالسودان وغدا الاخير به سنفتخر.... فقط ابعدوه عن غيره....... السودان فوقهما معا وفوق الجميع بلا استثناء عافيته من تسرى فى ابنائه واجزائه.. لا العكس
    [/frame]

  18.  
     
  19. #20
    إعلامي مريخي
    رقم العضوية : 1718
    تاريخ التسجيل : Jan 2010
    المشاركات: 252
    التقييم: 50
    معدل تقييم المستوى
    49

    افتراضي مـــكتــبــة الاســـتاذ/ هيثم صـــديـق (من هــنا وهـــناك)

    [frame="4 10"]
    شجعوا ضد الهلال بقلب قوى


    ونحن الحِنه والجرتقْ



    ونحن الزفه والسيره ،



    ونحن ..أبشرى والشبال ،




    ونحن السَىْ



    ونحن الوَىْ



    ونحن الرقبه .. والتُمْ تُمْ



    ونحن اللَمْ ..



    يكون فى الدنيا ..متلنا ..لمْ




    (سيد احمد الحاردلو)


    *اذا كان اعلام الدل قد نسب فوز السودان للهلال...... فهل سينسب فوز الهلال للسودان.. ان فاز بكاس الكونفدرالية؟؟


    الاجابة اوضح من انتماءهم الضيق واكثر جلاء من توجهاتهم الجزئية


    ولاننا فى المريخ لن نترك تشجيع المنتخب ولو جاءوا له بمرتزقة يمثلونه لا باولاده من الهلال وغيره........... فاننا فى حل من تشجيع الهلال على اى نطاق بحسبان انه لايمثل الا نفسه... ونغلق هذا الباب..........طااااااااااااااااااااخ


    *اضم صوتى لصوت العزيز ابراهيم عبد الرحيم فى نصحه لهيثم طمبل بعدم الاستعجال فى العودة خصوصا ان الموسم فى شهوره الاخيرة


    *لا لعودة اكرم للمريخ مجددا يكفينا ما نلناله على يديه... وفى وجود رمزى لا نحتاج الا لاحتياطى يمكن ان يكون حافظ ... مع العلم ان اكرم فنيا خير من حافظ لكن على اكرم ملاحيظ تجعل عودته للمريخ نظريا مستحيلة وان نرى ان عودته عمليا قريبة لاننا نعلم كيف يفكر الاداريون عندنا


    *ترى متى سوف يتم افتتاح المدينة الرياضية ان لم يك مع استضافة بطولة مثل بطولة افريقيا للمحليين...... واحتمال ان يعطينا الكاف شرف استضافة امم افريقيا الاساسية 2070 بمناسبة مرور مائة عام على اخر استضافة لنا لها فهل يرضيكم ان تكون المدينة الرياضية لم تكتمل بعد


    * هل اهدى لاعبوا المنتخب النصر لهيثم مصطفى لانه اعتقد انهم بدونه لاشيئ فردوا عليه!! ... ام هى مشاطرة لقائد اثر الاعتذار


    *الخرمجة برئية عن الذى تفعله لجنة البرمجة........ زكرونى نكتة صاحبنا الذى جلس لامتحان الدين وعند كل سؤال لايعرف له اجابة كان يكتب(الله اعلم .. ومن قال الله اعلم فقد اجاب)


    *اللكزس هدية ... ما علاقة شخصية


    ترى كم لكزس دخلت البلاد بعد الزيارات الاخيرة لحاكم ولاية( مادغرى)!!!


    *لن نرضى باقل من خماسية امام الفرقة الهلالية الساحلية لان المريخ الان شبه مية المية


    *النيجر هزمت مصر


    *لم يفوت الهلالاب (صيد البلد) ان يفاوض الاهلى القاهرى وارغو.... فخرجوا بمفاوضة الاهلى لسادومبا


    *الارباب اكد ان المريخ ما كان ليخرج لوكان هو رئيسا للاتحاد وسافر معه للنيجر


    *الحمد لله لم يفز الارباب برئاسة الاتحاد


    *هسى كان نودى وشنا وين من اولادنا لو الكاف اختار لنا الهجين؟!


    *ولكن لماذا لم تتعاقد شركة باجعفر مع مجلس الهلال لتسويق منتجاتها الدعائية


    *مع العلم ان هذا التسأول باثر رجعى لايام لم يكن مالك جعفر فى مجلس الهلال... ولا معتصم جعفر رئيسا للاتحاد العام.... وكان الارباب رئيسا للهلال ويمنح اذونات الزيارة لمن يشاء!


    *هل سيترك محمد سيد احمد مجلس الاتحاد العام ويترشح لمجلس المريخ كما وعد؟


    *مع احترامى له وامنياتى له بالشفاء... ميرغنى ابوشنب لايستحق وساما مثل الذى اعطى احمد محمد الحسن!!!


    *نعم هى منقصة فى حق كروجر ان لايشاهد مباراة المنتخب.... ونتمنى ان يكون ويلى كونهارد قد شاهدها ليفتينا فى لياقة قلق


    *نرجوا ان ينشر لنا الاتحاد العام عقوداته التى وعد بها مع الجهاز الفنى للمنتخب وان تكون مجزية ولائقة كما نتمنى ان يحقق مع طبيب المنتخب فى اسباب طرده


    * انا اشد الناس سعادة بالتقارب مع اهل المريخ الذى تظلل سحائبه المجتمع المريخى الان ولايزال دعائي ان ياتى خالدا ورفاقه(الفاعلين) لمجلس قادم... وهو نحن وهم غير اعلاء شان المريخ عايزين شنو وحتى يكون المريخ سيد الكورة



    يا الصفاقسى الفى تونس
    [/frame]

  20.  
صفحة 2 من 49 الأولىالأولى 1 2 3 4 5 6 12 ... الأخيرةالأخيرة

معلومات الموضوع

الأعضاء الذين يشاهدون هذا الموضوع

الذين يشاهدون الموضوع الآن: 1 (0 من الأعضاء و 1 زائر)

ظ…ظˆط§ظ‚ط¹ ط§ظ„ظ†ط´ط± (ط§ظ„ظ…ظپط¶ظ„ط©)

ظ…ظˆط§ظ‚ط¹ ط§ظ„ظ†ط´ط± (ط§ظ„ظ…ظپط¶ظ„ط©)

ضوابط المشاركة

  • لا تستطيع إضافة مواضيع جديدة
  • لا تستطيع الرد على المواضيع
  • لا تستطيع إرفاق ملفات
  • لا تستطيع تعديل مشاركاتك
  •