صحيفة المريخ اون لاين
صفحة 1 من 53 1 2 3 4 5 11 51 ... الأخيرةالأخيرة
النتائج 1 إلى 10 من 528
     
  1. #1
    نائب المدير العام
    رقم العضوية : 1249
    تاريخ التسجيل : Dec 2009
    المشاركات: 7,676
    التقييم: 54
    معدل تقييم المستوى
    85

    مـــكتــــبــة الاســـتاذ/ بابكر سلك (في السلك)

    • الجماعه كتر خيرهم اول امس وامس مدحوا الدافي ما خلوا ليهو شئ
    • سمعنا باولاد حاج الماحي واولاد البرعي كمداحين ممتازين
    • اولاد الارباب ديل جداد لنج
    • المهم الدافي طلع العب زول في العالم بشهادة الجماعه
    • وطبعا كانت القنبله لما اكتشفوا انو الدافي حقنا وبضاعتنا ومخزننها في بلدو
    • والمرابط برضو بضاعتنا ومخزننها في تونس
    • اقول ليكم حاجه
    • ماتستبعدوا البرنس يكون تبعنا ومخزننوا عند الجماعه
    • اصلوا المخازن جمبهم كتااااار
    • اشتري وخزن
    • والمفلس يتفرج
    • الوالي خلي المايشتريش يتفرج
    • واتفرج ياسلام
    • المايشتريش دي حلوه
    • اسم جديد للجماعه
    • يعني تاني تلقي مانشيت كبير
    • اليوم المايشتريش والمورده في ديربي خطير
    • او
    • المايشتريش يودع البطولات الافريقيه مبكرا
    • المهم الدافي طلع تبعنا
    • والجماعه جقلبوا
    • قالوا الوالي حاول ان يفشل ليهم الصفقه
    • والوالي ظهر في الرياضيه
    • وضع النقاط فوق الدولارات اقصد الحروف
    • وقال طيب
    • الناس الدخلوا مع الجماعه في صفقات وفشلت برضو الوالي فشلها ؟
    • شماعتكم بقت الوالي !
    • المهم اي فشل حقكم بقيتوا ترجعوهوا للوالي
    • كترتوها
    • ذكرتوني قصة جورج بوش الابن
    • ايام كان رئيس امريكا
    • بعد ضربة برج التجاره
    • كان بيلقي في خطاب امام مجلس الشيوخ
    • الحرس الخاص بتاعو دنقر في اضانو وقال ليهو ياريس لستك عربيتك نفس
    • جورج بوش برااااحه قال ليهو Its بن لادن
    • يعني بن لادن
    • وواصل في الخطاب
    • تاني دنقر فيهو وقال ليهو جايبين ليك العصير الكبايه وقعت وانكسرت
    • بوش براحه قال Its بن لادن
    • وواصل بوش في الخطاب
    • بعد شويه الحرس دنقر فيهو وقال ليهو ياريس المدام حامل
    • بوش قال ليهو Its بن لادن
    • والجماعه زي بوش
    • اي حاجه يقولوا ليك Its الوالي
    • حيرتونا
    • استادكم شين
    • برضوا ده من الوالي
    • عينكم للعديل تلفوا من الفيل وتطعنوا ضلو
    • المهم
    • امس فكرة انضمامي لغرفة تسجيلات الجماعه عجبت كتير من الصفوه
    • واحدين اتصلوا بي معلقين
    • وواحدين علقوا من خلال الرسائل
    • الليله اختار ليكم رسائل الصفوه لؤي مبارك
    • بالمناسبه لؤي من ناس الحتانه
    • لؤي قال في الرسائل
    • مانشيت صحيفة الهلال : قيادي هلالي يقول : سلك حاول ابتزاز الهلال وكامبوس اوصي بعدم تسجيله
    • مانشيت صحيفة المريخ: سلك يغادر غرفة الهلال ويغلق موبايلو ويختفي عن الانظار
    • مانشيت وهج الصفوه : خالة سلك : ماعافية منك يا سلك ياولدي كان مشيت الهلال
    • مانشيت صحيفة السوبر : حد يشعر بالسعاده يختار البعاد !
    • مانشيت صحيفة حبيب البلد : دولارات الوالي تعرقل انتقال سلك للهلال
    • مانشيت صحيفة المريخ اليوم التاني : سلك قعد مع الوالي وما قاااااااام
    • مانشيت صحيفة الهلال اليوم التاني : Its بن لادن
    • اولاد الارباب
    • المدحه الجايه مقبله علي وييييييييييين ؟
    • وليد البشري الهلالابي محموم وجسمو داااااااااااافي
    • الله يشفي
    • في مسلسلين جداد لنج
    • واحد اسمه الدافي مافي
    • والتاني اسمه الوجع الخرافي
    • والرشيد قال الدافي خرافي
    • خرافي ياروشا مافهمناها
    • تكون قاصد من الخرافه ولا قاصد من الخرفان !
    • ناس قسم ماصرفوا
    • Its بن لادن
    • ياناس
    • قنبله وطلعت فشنك
    • افشل مفعولها خبير الدولارات
    • اقصد خبير المفرقعات
    • عرفتوا منو ؟
    • Its بن لادن
    • جورج بوش الماسوره
    سلك كهربا
    Its بن واااااااااااااااااااااالي
    والي لقاء



    بسم الله الرحمن الرحيم



    في السلك



    • الدافي

    • ممكن يكون جو

    • يعني زول يقول لي الجو فوق كيف ؟

    • اقول ليهو دافي

    • وممكن يكون درجة حرارة سائل

    • يعني زول يقول لي الشاي برد ؟

    • اقول ليهو ماخالص , دافي

    • وممكن يكون درجة حرارة فرن

    • يعني ايام الخبيز واحده تقول لجارتها الفرن كيف

    • جارتها تقول ليها دافي

    • وبرضو ممكن يكون مظهر لمرض يصيب الجسد

    • يعني تسأل عن مريض تقول الليله بقي كيف

    • يقولوا ليك الحمه نزلت شويه وجسمو دااافي

    • وممكن يكون اي شئ

    • لكن لايمكن يكون لاعبا لغير المريخ

    • لا يمكن ان تكون مسخن ( مفلس ) وتحلم بان تصبح ( دااااااااافي )

    • فضوها سيره

    • الزول الحاسي بتعب شديد في جسدوا

    • ووشوا مختوف ولونو شاحب

    • نوصيه بالحمام المغربي

    • رااااااقد في البلد دي

    • ولو ما عندكم الرسوم الله يرحم من يرحم

    • استحموا في البحر

    • المنطق يقول ان الاهله هم اسعد الناس بعودة الدافي للزعيم

    • والسبب واضح

    • هو ان عودة الدافي تحتم اعارة وارقو

    • ووارقو بعد الموسم الماضي والذي نسميه موسم تكوين الزهرات كانت زهراته ستتفتح في هذا الموسم

    • عشان كده انا ما فرحان برجعة الدافي علي حساب وارقو

    • لكن الله يكضب الشينه

    • طبعا اولاد الارباب تفننوا في مدح الدافي في الايام الماضيه

    • وتفننوا في الحوارات مع الدافي

    • لكن كانت حوارات مع ياتو دافي ماعارف

    • يعني في حوار قالوا كان مع الدافي ذكروا فيه ان الدافي قال انه كان يتمني للهلال بطولة افريقيا وهو لاعبا بالمريخ

    • الله يسألكم ده كلام !

    • القصه دي ذكرتني قصة الزول العاجباهو واحده شديييييييييد

    • قالوا قال للناس انشاء الله يعرسها حسن اخوي

    • تخيلوا !

    • المهم قالوا فييرا كان اول المفاوضين للدافي

    • الترجمه كانت تحت الشريط ياربي !

    • عرفتوا تسجيلات الجماعه فاشله ليه ؟

    • معقوله المفاوض الرسمي فييرا !

    • دي تكتبها كيف ياحسين !

    • برضوا تقول لي جمال الوالي افسد صفقة انتقال الدافي للهلال !

    • كلام الايام القادمه حايكون منحصر في ان الهلال ماداير الدافي لكنه تدخل ليرفع سعره ويرهق المريخ , ونجح في ذلك

    • ارهقتونا

    • تعبتونا

    • فلستونا

    • قال يرهق المريخ قال

    • مريخاب الكلاكلات صفوه حلوه جدا

    • امس اتصل بي احد صفوة الكلاكلات وقال لي صحي الارباب مشي مصر واشتري كرت الدافي ؟

    • قلت ليهو اشتراهو من الموسكي !

    • ضحك لما رصيدو كمل

    • اقول ليكم يا اهله

    • المايشتريش ماعندو ليكم قروش عشان يشتري وما عندو زمن يتفرج علي الوالي

    • عشان كده شوفوا ليكم موضوع تاني في اليومين دي اشغلوا بيهوا انفسكم

    • شوفوا موضوع المرافعين المدور الايام دي

    • تفتح الجريده من الصباح تقول فتحت البيطري

    • الجريده كلها كلاب

    • وبعدين المرافعين دي مواظبه ولا تتغيب عن الظهور اليومي

    • وتقول عندها تاتشرات

    • يوم في الجيلي , المغرب في السلمه , بالليل في امبده , تاني يوم في خور ابو عنجه تالت يوم في الدروشاب والكدرو رابع يوم في شمبات

    • ماشاء الله مرافعين ما بتغيب ابدا

    • وكمان طلعت قصة عشه ام ضنب وحواء ام شنو ما بعرف

    • المهم دي كلها مواضيع ممكن تشغلكم عن التسجيلات وتخلي برود الحال عندكم داااااااااافي

    • المهم في كلامكم عن المرافعين ما تجيبوا سيرة الزريبه عشان ما تلفتوا نظر المرافعين لاكبر زريبه في الشرق الاوسط

    • بالمناسبه طبعا سمعتوا بكرة الصاله

    • الخماسيات

    • الناس البلعبوا كرة قدم داخل الصالات

    • خمسه لاعبون لكل فريق

    • وملعب صغير

    • يعني لعبه تحتاج لمهارات عاليه جدا في التحكم بكلتا القدمين

    • عشان كده شفنا في الخماسيات العج وجندي نميري

    • ياربي البرنس كان لاعب معاهم في الخماسيات ولا ما كان لاعب ؟

    • طالما الامر يتعلق بالمهاره يخيل لي انو كان لاعب

    • ذكروني يا اهل الله

    • قال مهاره قال

    • مريخ 2010 ماشاء الله

    • Its بن والي

    • هلال 2010 لي اسي ما سجل

    • Its بن منو يا ربي !

    • يوسف محمد شارك مع نيجيريا ضد مصر

    • نيجيريا خسرت بالهبل

    • الحمد لله النيجيريين ما لعبوا سولي وقودوين

    • حكمة اليوم

    • قروش مافي 000 مافي دافي خرافي



    سلك كهربا

    الدافي شالو المرفعين

    والي لقاء

    سلك

    الأخ بابكر سلك ما فهم الجماعة هم كانو يقصدوا إنهم اشتروا (ساونا) من المغرب فبدلا من الساونا قالو دافي بغير قصد وانا شوف عيني الحبيب ماخد حمام دافي


    بسم الله الرحمن الرحيم

    في السلك-بابكر سلك


    • انفجرت ؟
    • ولا طرشقت ؟
    • طرشقت وما انفجرت
    • ده كلام شنو ده
    • الفرق شنو بين طرشقت وانفجرت ؟
    • طرشقت بوووووووووووووووو
    • وانفجرت دووووووووووووووول
    • هي شني هي ؟
    • القنبله
    • يعني الجماعه راجين دووووووووووووووووووووووول
    • طلعت بوووووووووووووووووووووووووووو ؟
    • لكن تطلع بووووووووو في الجو الدااااااااااااافي ده ماحاره !
    • المرافعين اليومين دي حايمين
    • يوم بصقوا وياكلوا شئ ويهربوا
    • ويوم بتكتلوا
    • برضوا طلعوا بي شئ
    • رساله انيقه جاءت من صديق صفوه ولماح تقول
    • من كان بلا دافي ولا نفطي وجب عليه بشه
    • اسلام قالت لي يعني الدافي للجماعه طرشق ؟
    • قلت ليها صاح
    • قالت لي والتفاصيل شنو ؟
    • قلت ليها والله ماعارف , لكن قريت انو الجماعه قعدوا معاهو واتفقوا ولما جوا راجعين ابي يجي معاهم
    • قالت لي انا سمعت كلام قريب لي ده
    • قلت ليها سمعتي شنو ؟
    • قالت لي قالوا مندوب الجماعه قعد مع الدافي في المغرب وقدم عرضو
    • الدافي طبعا مسبقا عارف عرض المريخ , وبعرف المريخ
    • قام مندوب الجماعه قال ليهو يلا قوم يا الدافي
    • الدافي قال ليهو اقوم ليش ؟
    • مندوب الجماعه قال للدافي قوم نروح
    • الدافي وفي بالو عرض المريخ قال لمندوب الجماعه روح انت , اني بنجو مع العفش
    • ضحكت
    • الله يجازي محنك يا اسلام
    • اتاري القصه كده
    • المريخ في اي مكان اي زمان
    • في الدوري الاسباني المعلق قال ميسي يذكرنا بالعجب لاعب المريخ السوداني
    • في كأس العالم للانديه المعلق قال موبوتو المنتقل للمريخ السوداني
    • في نهائيات افريقيا للدول الحاليه المعلق قال لاسانا لاعب المريخ السوداني
    • وحايقول هيثم مرابط لاعب المريخ السوداني
    • وفي كأس العالم كان في لاعب اسمو ابالو
    • وابالو ده كان لاعب المريخ السوداني
    • وصفقة وارقو السنه الفاتت كل العالم تحدث عن المريخ السوداني
    • وهداف افريقيا للانديه السنه الفاتت وارقو لاعب المريخ السوداني
    • وهداف افريقيا السنه دي ايداهو لاعب المريخ السوداني
    • ياربي دافي غير المريخ السوداني ؟
    • اقصد مافي غير المريخ السوداني ؟
    • انا لو محل الجماعه اعيد قيد قسم خالد وياسر عائس واسك المرافعين يمكن اجيب بطوله للبلد دي
    • قالوا الهلال يصرف النظر عن الدافي
    • لأ 00 احسن مايصرف النظر
    • قالوا صرف النظر عن المساكين رحمه
    • الزعيم بدأ الاعداد
    • تعالوا جميعا نوفر جوا معافي للمجلس والدوائر المساعده واللاعبين لنحصد موسما كله انجازات
    • تعالوا نستمتع بمريخ عالمي وقوي وبطل جوي جديييييييد وشدييد
    • تعال ومعك آخرون
    • تعالوا نقدم الدعم المعنوي والمادي
    • تعالوا نفعل مشروع تحويل الرصيد
    • بالمناسبه الباشمهندس حسام اعد دراسه لمشروع تحويل الرصيد دقيقه جدا وتمكن الزعيم من تسجيل ميسي
    • يعني ياوالي دورك في تسجيل ميسي مجرد المفاوضه فقط
    • اقعد مع ميسي عشان ميسي مايقوم وخلي الدفع علينا
    • الجماعه
    • حولينا وما علينا
    • الجمال ده من شنو ؟
    • I ts بن وااااااالي

    سلك كهربا
    بسم الله ابتدينا
    والي لقاء


    كلام فى السلك والله

    بسم الله الرحمن الرحيم
    في السلك

    • المريخ زعيم فعلا
    • يخزن في تونس وليبيا وسويسرا
    • وغيرنا يخزن في شندي
    • اوعه الجقر
    • والجقور من ( القوارض )
    • يعني ممكن الجقور يقرضوا ليكم البضاعه المخزنه كلها
    • ولو كبيتوا جمكسين البضاعه بتتلف
    • اخير ما تكبوا جمكسين
    • لو المخزن ضايقكم بالجقور ما تمرقوا البضاعه بره
    • المرافعين حايمين
    • انتوا بمناسبة المرافعين لو تسجيلاتكم ما تمت تموها من المرافعين الحايمه دي وتبقي قتبله جد جد
    • الناس راجيه الحاج يوسف
    • جابوا ليهم الحاج يوسف
    • الحاج يوسف بالترعه
    • الترعه الدخلوا بيها المصريين علي نيجيريا
    • قال قنبله قال
    • بمناسبة المرافعين تاني
    • الحاصل ده لامرافعين ولا حاجه
    • مجرد كلاب مسحلبه
    • كلاب عندها جنون الكلاب
    • اللهم احفظنا يا الله
    • ابو الهل السنه دي ماسجل لانو صاحب مبادئ
    • المبدأ الاول بقول الغالي متروك
    • اي زول مشوا ليهو لقوهوا غالي
    • وعشان الجمهور يتفشه جابوا بشه
    • المبدأ التاني بقول اي لاعب يجي بالاقساط
    • وطبعا ما لقوا لاعب بالاقساط
    • اديكم فكره جيبوا لاعبين خ استثمار
    • بدون جمارك
    • وبعد تنتهي فترة الاعفاء اشتروهم من الجمارك خرده
    • بس اوعه الجقر
    • قالوا يوسف محمد استعاره سااااي
    • لكن ما ورونا استعاره تصريحيه ولا استعاره مكنيه ؟
    • بتكون مكنيه
    • المكنيه دي موش جمب شندي
    • انتوا وين الزول التايواني القالوا ختفوهوا من المطار
    • الزول القصير داك
    • ده غايتو خزنوهوا في المتمه
    • عشان لسه صغير وما تم
    • مريخابي كبير قال لي السنه دي الدخول للتشكيله في المريخ اصعب من الدخول لمجلس الشعب
    • قلت ليهو هو الشعب منو ؟ ما شعب المريخ
    • اوعه الجقر
    • يعني يابكري المدينه ودوك شندي عشان يجيبوك بعد سته شهور ؟
    • موظف انت ؟
    • افرض بعد سته شهور ماجات تمشي وين ؟
    • ممكن بعد سته شهور ما تجي جد جد
    • يعني الارباب ممكن يقنعك بان السته شهور ماجات
    • هو الاقناع شنو
    • ماقرايه وغني
    • والارباب ملحن عظيم يا بكور
    • لو محتاجين للدافي كلموا بكري المدينه يجيب ليكم ( فراد ) من شندي
    • والله فردة شندي دااااااااافيه خلاس
    • وبتخلي الجو دااااااااااااااااااااااااافي
    • انحنا اعدادنا بدا بحمد الله
    • الجماعه متين ؟ ووين ؟ ماسمعنا بالنجيله شربت من الموسم الماضي
    • المعسكر بتاع مايرنو متين ياربي ؟
    • نحنا غايتو ماشين كينيا
    • بالمناسبه
    • انتوا موش كان عندكم معسكر في ايطاليا ما مشيتوهوا ؟
    • مسكلوا ليهم
    • لما يرجعوا ليكم قولوا ليهم ادونا معسكرنا الطالبنكم ليهو
    • بس في ايطاليا اوعه الجقر
    • بختك يازومه
    • جددوا ليك تلاته سنين وجابوا ليك الجنينه
    • الحاج يوسف
    • ارعي سااااااااي يازومه
    • غايتو لو مستوي الحاج يوسف ياهو الشفناهو يوم كرة مصر
    • ابقوا عشره علي التعاون
    • قال جمال الوالي بدولاراته يعرقل انجازات الهلال
    • يعني جبتوا نقاش واديتوهوا الجير وقلتوا ليهو جير الاستاد قام جمال مسكو من بستلتو وقال ليهو ما تجير !
    • ولا جمال دسه السلم من النقاش
    • ولا جمال ربي الجقر في الاستاد ؟
    • اوعه الجقر

    سلك كهربا
    المرافين وصلت الحتانه
    والي لقاء
    سلك

    مشكور اخونا ايهاب
    وشكراً للرائع بابكر سلك بالمناسبة سلك ده رباطابي وود حلتي

    بسم الله الرحمن الرحيم
    في السلك

    • انتهت التسجيلات
    • و الاهله كعادتهم يبخسون لنا ما انجزناه من اشياء
    • علي الرغم من انهم لم يحاولوا مجرد الانجاز في التسجيلات
    • غرفة تتملي وتفضي زي ( الحبن )
    • والحال في حالوا
    • عليكم الله فريق يسجل النفطي ويتعاقد مع مرابط ويخزن الدافي
    • بل ويعيد تسجيل ثلاثه من نجومه ليرتاح باله في الموسم القادم
    • ويسجل طارق مختار نجم المنتخب القومي
    • يسجل نجم الدين
    • ويأتي بغاساروكا
    • ويسجل درة امبده عبدالرحيم ووهج الشجره حمد
    • وبعد يقولوا فشل
    • والبقول منو ؟
    • الناس الماقدروا يغيروا التعاون وخليفه
    • وسكن تاج المورده لديهم بغرفة التسجيلات لمن بقي من اصحاب الغرفه حتي سجلوهو
    • وطبعا في ناس من مدني المدينه وخزنوهم في مدينه اخري
    • اوعه الجقر
    • عليكم الله الفشل منو ؟
    • اختشوا
    • تسجيل الحاج يوسف لا يحتاج لابداء رغبه وارنيك تسجيل
    • يحتاج فقط ( لاسبليت يونت ) 24 وحده
    • كندشوهو
    • بختك يا الزومه جنينتك في الدرب
    • يا مزمل ما ضروري يوسف يمشي من بنغيلا لي مجدي في لوبانغو , ممكن مجدي يمشي من لوبانغو لي يوسف في بنغيلا ويقول وقع امامي
    • الموثق لما يمشي للاطراف عشان يوقعوا علي توثيق يجب ان يكتب فيه انا فلان الفلاني ذهبت للمنزل رقم كذا مربع كذا مدينة كذا حيث وقع الاطراف امامي
    • لكن لو الاطراف حضروا امام الموثق بمكتبه طوالي الموثق بكتب حضر امامي
    • اصبر يامزمل ونشوف مجدي كتب انتقلت ولا كتب حضر امامي
    • وبعدين نحكم
    • ومجدي محامي يامزمل ماتنسي
    • يعني بعرف الفرق بين حضر امامي وانتقلت
    • الناس التسجيلاتهم ناقصه حقو يصبروا للتكميليه ويتموها مويه
    • انشاء الله يتموها من المرافعين الحايمات اليومين دي
    • المرافعين وصلت الحتانه
    • السنه دي البمشي الحتانه يا حليلو
    • المرافعين بتاكلوا وتريحنا منو
    • تاني نشمت في منو ؟
    • في ناس قالوا المريخ يتخبط
    • يصرف النظر عن الدافي ويعود اليه بعد ان علم باتفاق الدافي مع الهلال
    • يشطب الشغيل اليوم ويسجله غدا
    • ياناس
    • الدافي اساسا حقنا
    • انتوا شفتوهو وين ؟
    • وبعدين بالقياس كده علي الشرع في فقه الاسره
    • الزول لو استغني عن زوجته وجاها عريس جديد الناس العاقلين بقولوا ليها طالما دايره العرس اخير ليك راجلك القديم وابو عيالك , عرفتيهو وعرفك , ويضربون لها المثل بحاكية الشيخ فرح ود تكتوك بتاعت الابريق
    • والدافي زولنا
    • وطالما رغب اللعب في البلد دي اولي نحنا
    • اما الشغيل فتم شطبه لان الزعيم يحتاج لخانه يرفع فيها وارقو من السنيه والشغيل مصاب
    • ولما الاتحاد استثني الموضوع بناء علي طلب الجماعه لبركيه
    • اصبح وارقو لاعبا في السنيه
    • وهناك خانه شاغره اولي بها الشغيل
    • لكن السؤال
    • هل يوجد ما يمنع شطب لاعب وتسجيله في اليوم التالي بنفس الفريق ؟
    • برضو قول لي الاتحاد
    • الشغيل ده بقياس الشرع في فقه الاسره طلقناهو وقلنا ليهو مرجوعه في مسماك
    • لكن يوسف محمد العده كملت والا بعقد جديد
    • والعقد لو ما توافرت فيه شروطه كامله يبقي العقد ماصحيح
    • يبقي الموضوع ما عرس
    • يبقي حاجه تانيه
    • وذلك طبعا حسب رأي الشرع في فقه الاسره
    • وقياس الشرع يقودنا للحديث عن لاعب يترك فريقه ويذهب لاخر
    • يصدم بالواقع المرير
    • يعني زي زوجه تصر علي تطليقها من زوجها وتتزوج بآخر
    • وعند الآخر ده تلقي الفلس والعيشه ( الشلش) وتندم علي البيت الاول السيدو هاشي وباشي وصراااااااف وفي ايدو ماحقتو
    • وعيشة الضنك تخليها تشتهي الموز ماتلقاهو
    • زي ناس فييرا
    • وبالقياس علي فقه الاسره الزعيم لما يشطبك بديك مؤخر صداق وبدل متعه
    • مازي ناس كده النفقه الا تجرجرهم في المحاكم
    • اسلام قالت لي كورتنا مع الجماعه في الدوري في استادهم متين ؟
    • قلت ليها قريب ده
    • قالت لي خاشيها
    • قلت ليها طبعا
    • قالت لي اوعه الجقر
    • رابطة المركزيه اقامت حفله زي الحفله استقبالا للجدد ولا اقول وداعا للقدامي ولكنه استقبال للقدامي في محراب آخر في محراب الزعيم فأجادت الرابطه كعهدها ولمعوا جميعا والتحيه لاخوان سعديه ناس كرنديس اجمعين
    • والكشافات ولعت من المغرب
    • لما رجعت البيت لقيت خالتي من كترة الركيع رجلينها بقوا رقاااااااااق زي اسامه التعاون
    • في الحفله قاساروكا كان في المنصه وبوز الحزاء في موقف العربات
    • يعني اكرم لو طلع من قونو تطلع عينو
    • مقاس 49
    • حزاء قطع ولعب قطع
    • بالمناسبه غاساروكا يتحدث ثلاثه لغات بطلاقه غير ( الرطانات )
    • يعني بتفاهم مع اي حكم
    • الصفوه شرفوا الاحتفال
    • ورابطه المشجعين بالعشره اقامت جمعيتها العموميه بدري بدري وحرصوا علي حضور الاحتفال
    • وصفوة ربك حضروا
    • وناس الحتانه كانوا قاعديييييين برغم المرفعين
    • التحيه لكل من شارك وبارك وقال ماشاء الله والله تبارك
    • الجماعه لسه طافييين
    • ياربي النور مقطوع ولا بولعوا بعد نيالا
    • قالوا واحد حلمان قابل الوالي
    • قام الوالي قال ليهو ظروفك كيف ؟
    • الزول في الحلم قال للوالي كلك نظر ياريس
    • الوالي دخل ايدو في جيبو مرت الزول الحلمان صحتو
    • طلقها
    • انتوا وضع المعز شنو بالقياس علي الشرع في فقه الاسره !
    • اليومين دي اوعه المرفعين
    • اوعه الجقر

    سلك كهربا
    الناس راجيه الحاج عيسي تجيب ليهم الحاج يوسف بالترعه !
    والي لقاء
    سلك

    البون الشاسع بين صحفي نادي المريخ العظيم والصفيراب واضح جداً ... وسلك مبدع مريخي جميل .. كتاباته رهيبه وعجيبه .. منطق .. سخرية .. حقائق .. واقع ...
    سلك في السلك ... تحياتي لكل مبدعي الزعيم ...

    بسم الله الرحمن الرحيم

    في السلك





    • بالامس طالعت صحيفة قون الرائعه بمزاج

    • لقيت فيها حاجات عجبتني جدا

    • ولقيت فيها حاجات ضحكتني

    • ولقيت فيها حاجات حيرتني

    • ولقيت فيها حاجات ضحكتني لما دمعت

    • وكانت الحصيله اني استمتعت

    • وقلت اعزمكم معاي متعه

    • اولا الحاجات العجبتني جدا

    • البرنس قال 0000 ونحن علي اعتاب موسم جديد نتمناه موسما للتصالح والتسامح والتصافي لكافة اهل الوسط الرياضي ( ويواصل البرنس الي ان يصل ) وان نبتعد عن التشاحن والبغضاء واثارة الفتنه ونبذ كافة الوان التعصب البغيض الذي لم نجن منه سوي مزيدا من الفرقه والشتات 0


    • ده كلام كبير يابرنس لايصدر الا من زول كبير يقدر المسؤليه

    • عجبني جدا حديثك يابرنس وانا اول المؤيدين له ومن الليله نبدأ

    • نعمل جمعيه رياضيه نسميها المحبه ومحاربة ناس البعملوا من الحبه قبه

    • شكرا هيثم

    • ثانيا : الحاجات التي ضحكتني تصريح النعيم حيث قال : البرنس يعاملنا معاملة الوالد وليس الاخ الكبير

    • ياولد يانعيم

    • ده كلام كبير

    • ثالثا : الحاجات الحيرتني قالوا تسجيلات الهلال جاءت حسب الخانات والحاجه

    • عليكم الله ده ماكلام يحير

    • زول مكابس في الدافي البلعب شمال

    • يفشل

    • يجيب زول بلعب يمين ويقول ليك جاءت حسب الخانات والحاجه

    • دي زي المرافعين جاءت من حلفا

    • رابعا : من الحاجات الضحكتني لما دمعت : قالوا الهلال في ذات الوقت لن يفرط في القابه المحببه

    • انتوا الهلال ده حايحب بطوله جويه متين ؟

    • اخجلوا ياناس

    • البلد يمثلها هذا العام اربعه فرق

    • فيهم تلاته لم ينجزوا دوليا وجويا ولا انجاز واحد

    • ومافي داعي لذكر الاسامي

    • وفيهم واحد حقق بطولات جويه لما ناس افريقيا قايلنوا نادي سودانير

    • وما بنجيب اسمو

    • كان جبنا اسمو الهواء بقسمو

    • ولذلك يجب ان تتضافر الجهود ليفوز البلد بجويه في هذا الموسم

    • يا التلاته الماجابوها يجيبوها

    • يا الواحد الجابها كتير يجيبها تاني

    • اسهل ياته ! انا خلوني

    • الاهله فرحانين بيوسف محمد

    • وليهم حق

    • الراجل لعاب

    • لكن من مميزاته انه يفشل امام الزعيم ( عودوا لكتاباتكم )

    • وطيب

    • وكت لعاب قدر ده مشي منكم ليه ؟

    • يا ماكان عندكم قروش يا ماكان مالي عينكم

    • المهم السبب في ذهابوا من جانبكم انو يوسف تعب مع موسي طيلة الموسم

    • والسبب من جانب يوسف ان الفلس تعب مع يوسف طيلة فترته معكم

    • ذكروني دقيقه واحده اجاد فيها يوسف وموسي بالميدان

    • ونحن فرحانين برجعة يوسف اكتر منكم

    • فرحانين لاننا شفناهو ضدنا

    • وفرحنا اكتر لما شفناهو ضد مصر

    • بختك يازومه

    • فات منكم يوسف محمد ورجع ليكم الحاج يوسف

    • المهم

    • قالوا مجدي قال يوسف اتصل بي تلفونيا وابدي رغبته للهلال

    • طيب يامجدي يا اخوي

    • افتح البلوتث عشان نرسل ليك الكرت الدولي بتاع يوسف

    • و الهلال يحول قروش يوسف لسويسرا رصيد

    • ولو ناس سويسرا مسكلوا ليكم ماترجعوا ليهو عشان مايرجعوا في كلامهم

    • الخوف رسالة الرصيد بتاعتكم تصل لسويسرا جزء من النص مفقود

    • جزء شنو ! النص كلو مفقود

    • هو لو في نص تاج المورده قاعد شهر راجي الضحاكات

    • المرأه ( الطلقوها ) امس , بتاعت الحلمه , الوساطات جاريه لاعادتها من جديد

    • انشاءالله ترجع رجعة الشغيل في نفس الليل ما تبقي عليها حكاية يوسف وتبعد طويل

    • الرائع محمد عبدالماجد شغال حسابات وارقو كلف دشليون دولار والدافي عشرمية مليون دولار

    • انت خايف علي قروشنا يا ودعبدالماجد ؟

    • انت ماعارف قروشنا دي زي اعشاب النيل

    • تشيل منها بالليل

    • الصباح تلقاها في سوق كوستي

    • قايله زي موية الزير

    • قبال تمسك الكوز عديل

    • يفضي الزير وتكابس البراميل !

    • اطمئن

    • ولما تجي تشرب من زيركم

    • اوعه الجقر

    سلك كهربا

    كملوها في التكميليه ولو ماكملت تموها مويه (او مرافعين )

    والي لقاء

    سلك




    بسم الله الرحمن الرحيم


    سلكشن




    كل الناس قالت رأيها في موضوع الحيوانات المتوحشه ( المرافعين ) والي الآن لم يجد الناس مايقنعهم بحقيقة الامر , والمسأله استفحلت واصبحت تشكل هاجسا جعل الكبار يرتجفون منذ ظهورالشفق الاحمر في المغرب وحتي طلوع فجر اليوم التالي , بل هاجسا جعل الرجال يرتجفون ذعرا خوفا من طلب زوجاتهم او ابنائهم لجرعة ماء ليلا (والزير بعيد ) والمرفعين من الخوف تكاد تراه في (غتاية الزير راجيك يا ابو الرجال ) 0


    استوقفني ما نشرته الاسطوره عن نفس الموضوع في كارثة الحتانه , واليوم انا لااكتب رأيا في هذا الموضوع بل احكي قصه حقيقيه وواقعه عشتها انا والمرفعين واطفالي , قبل حوالي السنتين من الآن كان في بيتنا ( مرفعينا ) عشنا معه داخل اسوارنا يأكل ويشرب وينام معنا بل وذهبنا به الي المستشفي البيطري بامدرمان ووجدنا السراب عندهم الا من معلومه قالها لي احد طلاب السنه النهائيه بكلية البيطره ووجدته داخل البيطري في ذلك الوقت يتلقي تدريبا عمليا 0 عند استفحال امر الحيوانات المتوحشه في هذه الايام وما كتب في الاسطوره عن امرأه تبكي لان الذي قتل ليس ( المرفعين ) ولكنه كلبها الذي ربته واحبته , استوقفني الامر وعادت بي الذاكره الي ايام التجربه الشخصيه التي عشتها مع ( المرفعين ) 0


    تفاصيل الحكايه هي اننا كنا نملك كلبا جيدا للحراسه ولكنه مهذبا وودودا لايعاكس الجيران وكان ( يفرز ) بين الناس ويعاملهم بكل احترام وينصاع لاوامرنا بكل سهوله , كان نظيفا بطبعه ويحب ان نناديه للاستحمام , يلعب مع اطفال البيت ( كانه واحد منهم ) يفقدنا ويفتقدنا و ( يتفقدنا ) كان حنينا جدا , ولجيراننا جريوان ( حليوان ) جلبوهما بعد ان شاهدوا العلاقه الجميله بيننا وكلبنا الرائع , كان يلاعب الجريوات باحساس الاب ويلعب معهما كانه نديدهما , وهما بدورهما كانا يحبانه , في ذات صباح سمعنا ضجيجا و معركه شرسه امام منزلنا بين كلبنا وكلب آخر , فتحنا الباب ( عشان نحجزهما ونقول ليهم الكلام ده عيب وانتو اخوان ) وجدنا كلبنا يتعارك مع كلب غريب عن الحي عراك مستمين , وكانت تبدو علي الكلب الغريب شرايه غير طبيعيه , وبعد جهد استطعنا ان نفض العراك وهرب الكلب الغريب وتواري عن انظارنا محملا بعدد لابأس به من ( عضات ) كلبنا ومخلفا عددا لابأس به من ( العضات ) علي جسد كلبنا 0


    في اليوم التالي ( طوالي ) لاحظت هدوء غير طبيعي علي كلبنا , وانطوائيه لم اعهدها فيه , وفي اليوم الذ تلاه بدأت تظهر عدائيه شديده من كلبنا تجاه اي انسان حتي ولو كان جارنا , وكان وقتها عديم التعامل مع الاسره كلها , نضع له الطعام ينظر الينا الي ان نبتعد ثم يبدأ في الاكل , اذا حاولنا ان نعدل له الاناء وبداخله الاكل يحاول ان يهجم علينا , وهي عاده لم تك عنده طيلة حياته العامره بين اسرتنا , شككنا في ان الموضوع سعر , ذهبنا به الي البيطري الذ اكد ان الامر ليس سعرا ولكن لم نجد تبرير علمي لماحدث للكلب رغم اني شرحت لهم المعركه مع الكلب الغريب والشرس الذي تعارك معه كلبنا , في ذلك الاثناء تصادف وجود احد طلاب البيطره وكان وجوده لتلقي التدريب علي ما اظن , قال لي ان كلبك يتعرض لحاله نفسيه سيئه تقوده للعوده الي اصله المتوحش , ولكي يعود كحيوان مستأنس يجب عليك ان تعتني به جيدا بعيدا عن اي حيوان آخر ( مايشوف حيوان ) وان تقضي معه فترات طوال الي ان يعود لطبعه وتذهب عنه الحاله 0


    عدت للمنزل واخبرت عائلتي بان الكلب يعاني من حاله نفسيه رديئه الامر الذي اضحك آلاء طفلتي الصغيره كثيرا , ونفذت وصايا طالب البيطره , وفي ذات يوم استطاع الكلب ان يخرج الي الشارع , شرسا غريبا جاء اليه الجريوان فرحان ( يهزان في ضنبيهما ) لانه ( وحشهما ) فاجأني الكلب الودود بالهجوم علي احد الجريوات واكله امام ناظري في مشهد ( يجنن ) ضربته وادخلته المنزل ولكنه خرج ثائرا وقتل الجريو الثاني وبدأ في اكله 0


    تولد لدي اصرار بعدم قتل الكلب الي ان اعرف حقيقة ما اصابه , وارجعته واحكمت وضعه في قفص كبير , كان يأكل ويشرب ولا يتعامل مع الناس , كل شئ فيه طبيعي الا ( عقله ) 0


    فجأه فارق الحياه وهو في كامل صحته بل اكل وشرب ومات في نفس اليوم 0


    ونسيت الموضوع ولكن بعد استفحال الامر في هذه الايام تذكرته خاصة اننا لم نجد تبرير علمي مقنع , كل المقتولين من الحيوانات المتوحشه ليس الا كلاب من فصيلة الكلاب العاديه , ولو كانت ذئاب لكان حجمها واحد ولونها واحد وشكلها واحد , لكن نلاحظ ان الاحجام مختلفه وان الالوان مختلفه وان ( الشعر ) مختلف 0 ومواقع الاعتداءات مختلفه , امبده الحتانه بحري السلمه الريف الجنوبي امدرمان الكدرو , ولو كانت تلك الحيوانات ذئاب لاتت من منطقه واحده ولسارت في شكل قطيع يصعب عليه ( قطع ) الكبري المحروس ليلا ونهارا 0


    الامر عندي ان مرضا يصيب عقل الكلاب هو اصل الداء يجعل منها وحوشا ضاريه , واخاف ان يكون جنون الكلاب قياسا علي جنون البقر 0


    المرض ليس سعرا لان السعر يتلف المخ ويميت المسعور في ايام معدودات , الامر الذي يجعلنا نطالب وبشده الجهات العلميه ان تقوم ببحوث سريعه وتفحص الحيوانات المقتوله لتصل لحقيقة الامر ومدي تأثر الانسان بهذا المرض ( والانسان في السودان ما ناقص ) 0


    ومطلوب من المواطنين حبس كلابهم بالمنازل وعدم تركها تتعرض لاي كلب آخر حتي لاتصاب بعدوي لا ندرك ماهيتها 0 وعلي الشرطه ان تقوم بحمله لابادة اي كلب ( لافي في الشارع ) الي ان يصدر لنا باحثينا بيانا هاما يوضح لنا ماهية الامر 0


    اللهم احفظنا وحافظ علينا ونظف بلدنا من الامراض التي لاقبل لنا ولكلابنا بها يا رب العالمين 0



    سلكتد


    كلاب مسحلبه


    والي لقاء


    سلك


    حقيقة كلام في السلك ياسلك وعقلاني جدا ان هنالك مرض ما يصيب الكلاب وعلي الباحثون ان يقومو بعمل البحوث اللازمه تجاه هذا المرض لكي يعرفو اصل الحكاية .. .....


    بسم الله الرحمن الرحيم


    في السلك



    • الرائع جدا علي همشري كتب امس تحت عنوان الهلال والمال


    • ضحكت شديد بمجرد ان قرأت العنوان


    • تذكرت عبارة الحراز والمطر


    • والحراز هو نوع من الاشجار يرمي بكل اوراقه في الخريف ويقيف ساااي (مولاي كما خلقتني )


    • شجر غريب , متحارب مع فصل الخريف


    • لاعلاقه له بالخريف


    • او قل علاقته بالخريف علاقه عكسيه


    • ما بتلموا اصلوا


    • فقلت لنفسي همشري ده قاصد بعبارة الهلال والمال الحراز والمطر !


    • بعملها همشري الذي اشتهر بالذكاء الخارق


    • وبرضو اشتهر بالخيال الخصب


    • يعني بفتح خيالات كده يحيرك


    • تتذكروا لما قعد مع وارقو في مصر واتحكر واتصور وقال وارقو قال مابجي !


    • ياهمشري فهمنا عبارتك


    • زي ما الحراز بقعد مولاي كما خلقتني امام المطر


    • يبقي الهلال والمال نفس المعني


    • هو ياهمشري المال ماشي كايس الهلال فايت الجمال !


    • المال والجمال


    • ماشات مع بعض


    • محمد عبد الماجد لي اسي واجعاهو قروشنا البنصرفها


    • يا حماده القروش عندنا البشيل منها بنشكروا لانو بكون فضي لينا مكان


    • انت قايلنا بنطلب من سيون تأجيل السداد اسبوع ؟


    • محمد علي سيد شباب الهلال قال لي عارف الفرق بين رئيسنا ورئيسكم ؟


    • قلت ليهو اشرح لي


    • قال لي الاتنين زي عدادات الكهربا بس بتاعكم دفع مقدم وبتاعنا سداد مؤخر زي العداد القديم الممكن بعد يقطعوا كهربتك تجر ليك سلك بي فوق وتنور


    • ضحكت


    • وقلت ليهو قربت يا ابو حميد


    • مرحبا بك


    • الجماعه لي اسي بمشوا المطار وبرجعوا سااااي


    • مشوا لكامبوس رجعوا بوكيلو


    • دي زي دايرين الدافي جابوا يوسف محمد


    • الوالي لايحتاج لدفاع ياناس


    • الوالي زي حامد بريمه


    • بلعب براهو


    • الغالي شجرابي كتب ترصع الهلال بالنجوم


    • ياربي قاصد حموده وعلاء الدين وسامي عبدالله ومن قبلهم باكمبا وعبده الشيخ وهلم جرا ؟


    • لا لعدم الانضباط


    • ولا كبير علي المريخ


    • بل ليس هناك لاعب اكبر من النادي الذي يلعب له


    • البتقاعس بعتبروا مات


    • وبنلعب بدونو


    • والاخوه الاهله لاكين موضوع النيجيريين لبانه


    • ويرددون تهديد الوالي لهم


    • لكنهم يتناسوا مدربهم الشاريهم


    • وتهديد ناديهم للاعبيهم الوطنيين المتواجدين خارج الوطن العزيز


    • نحن لا يفتننا شخص ويختلق فجوه بيننا وبين لاعبينا ونعرف كيف نتعامل معهم


    • الاخوه الاهله كانوا اسعد الناس برحيل وارقو


    • ولما فشل الرحيل ارادوا تفجير قنبله بين وارقو والمريخ


    • انتوا مالكم جنكم قنابل


    • كاوبويات اتوا !


    • تاني لما تجوا تسجلوا اقعدوا جمب جمال


    • ولما يدفع قولوا للنادي الدفع ليهو جمال نفرين


    • اتصال هاتفي جمعني بالصفوه محجوب بابكر رئيس الرابطه بالهدي


    • محجوب وعد بالتواجد بالمطار مستقبلا كأس افريقيا


    • موعدنا المطار يامحجوب ومن هناك بنرجع معاك الهدي ولان المقدم ماموصل بنبيت فداسي ونرجع تاني يوم


    • ناس في الاعداد وامبيلي في الكنغو ويقولوا ليك ايداهو


    • انتوا ود الحله ابدي الرغبه ولا كب الزوغه ولا الحاصل شنو ؟


    • التايواني وين ؟


    • الزول القالوا ختفوهوا من المطار


    • الزول القصييييير


    • البقيف حيلو جوه الاتوز


    • البلعب الكوره الارضيه ( هد )


    • جنس شتل


    • عودة قسم خالد وياسر عائس ضروره تقتضيها ساحات الصحافه الرياضيه


    • بصراحه انهما قلمان مميزان اشتاق اليهما قبل الاهله


    • بلاش حماقات


    • فالرساله لايحملها الا الرساليون اخوتي قسم وياسر


    • عودوا لهلالكم لتزينوا جيد الصحافه الرياضيه من جديد


    • اكتبا ليذهب الظمأ


    • شخصيا سأقرأ لكما ولو كتبتما بالفحم علي حيطة السينما


    • فالرائعون وحدهم هم الذين تتشرف بهم الاصدارات قبل ان يتشرفوا بها


    • حزن عميق علي رحيل مامون بمبان في ريعان الشباب


    • ولكنها ارادة الله


    • اللهم ارحم مأمون بقدر ما اسعدنا


    • واجعله من اصحاب اليمين



    سلك كهربا


    الي جنات الخلد


    والي لقاء


    سلك


    بسم الله الرحمن الرحيم


    سلكشن



    قاعدين كلنا امام التلفزيون كاسره مستقره وحترمه , نتفرج ونتبادل الحديث بين الحين والحين , جات اعلانات , اثاثات , كلها اثاثات , شعبله يشكر ويغني , ومحمد صديق يغني ويتبسم وناديه احمد بابكر رافضه الرجعه الا مع العفش , كل يوم بنضحك فيها لما تقول ( اني بنجو مع العفش ) كل يوم بنضحك , وماعارفين بنضحك علي ناديه ولا في ناديه ولا علي روحنا ولا علي اسياد المعارض البدفعوا قروش الاعلانات بالشئ الفلاني ونحن اكتر الناس فرجه علي اعلاناتهم وعلي اثاثاتهم , وشوف العين ما بكتل غزال , ومابنشتري , هو الشراء بالعافيه ! لو الشراء بالتمني كان تندلنا بيوت الايجار عفش لما تآمن , لكن ليس كل مايتمناهو المرء يدركه 0


    ياناس الاثاثات عمر الله بيوتكم وبيوت من يستطيع ان يشتري منكم , لكن نرجوكم قنواتنا كل روادها من ذوي البث الارضي , يعني الديجيتال الرخيص ده نهي طريقه ليهو , ومن له قدره علي تغيير الاثاثات ليسوا من رواد القنوات الارضيه , يعني بتعلنوا لي ناس ما بجونا بس تعذبونا 0


    يعني موظف ماقادر يغير نظارة القرايه يغير غرفة نوم كيف ؟ وهو زاتو النايم ليها شنو ؟ معقوله زول لغي وجبتين يشتري سفره ؟ زول يجلس القرفصاء في واطات الله دي عشان يحسب متطلبات الحياه يشتري غرفة جلوس ازاي يا شعبله ؟


    اعلان آخر يبشرنا , بشري للمواطنين , شقق تمليك وبقساط مريحه قد تصل الي اربعه وعشرين شهرا , لا ياخ ! معقوله ! وهي زاتها وين الشقق دي ؟ العمارات شارع كذا وكذايين ؟ وهو زاتها وين العمارات دي ؟ جوار الديم , طيب ماتقول كده من الصباح


    بالله عليكم زول بشتري كهربا بجنيه علاقة الاعلان الفات ده بيهو شنو ؟ قال بشري للمواطنين


    يا اما الزول العمل الاعلان ده غريب يا نحنا غرباء , ودي تبقي طامه كبري


    واعلان آخر , البنك المركزي يناشدنا بالمحافظه علي العمله , البنك المركزي الله يخليهو داير يورينا نحافظ علي قروشنا كيف , الله يسألكم ده اعلان بخص غالبية الشعب السوداني ؟ يابنك يامركزي لو عندنا عمله انت ما بتورينا نحافظ عليها كيف , ورينا يا بنكنا ويا حبيبنا نجيب العمله من وين ونعدك بالمحافظه والمحليه والولايه زاتها , بس هي تجي 0


    وكمان اعلان الشريحه المستهدفه فيه هي نحن , نحن ديل , الاعلان بقول في معناهو انو بودونا اريتيريا والحبشه عشان نقضي اجمل اجازه في التاريخ , خلاص نحن عملنا كل ضرورياتنا وفضل لينا التنزه والصياعه كمان خارج الوطن العزيز , لكن ماورونا اريتريا والحبشه ديل نمشي ليهم باولادنا ولا نزوغ منهم ونقول عندنا شغل ! الحته دي مهمه جدا 0


    واعلانات بسكويتات شاي الصباح واللبن رافض يدخل البيت ليهو سنين الا اذا كان في زول عيان خطر وكبايه واحده بس , قال بسكويت قال , بسكويت بالبا ؟


    ده غير اعلانات الودائع الاستثماريه , وسوق الخرطوم للاوراق الماليه , نحنا جيبوا اعلانات سوق سته , سوق امدفسوا , سوق كرور , سوق المرحوم كان قدرك , سوق استعمال بره , سوق الله واكبر العديييييييييييييييييييييل ده 0


    ناس شغلهم الشاغل المويه زادوها , المدارس بتقفل متين عشان الصرف يقيف , بمناسبة المدارس قرأت تصريح في الاسطوره لوزير التعليم يقول فيه لارسوم علي المدارس وفي مكان آخر بنفس الصحيفه يقول لايطرد الطالب الذي لم يسدد الرسوم 0


    اضحك ولا ابكي ولا اجري ولا اقول الله يقطع التعليم وسنينو ؟


    خلونا من الاعلانات , سمعتوا بي انفلونزا الماعز ؟ غايتوا انا ماخايف منها , لكن ملارية الاسود كان ظهرت الله يسترنا 0


    سلكتد


    الاعلان هو ترويج لسلعه او خدمه وسط القوه الشرائيه المستطيعه , ما تكملوا قروشكم ساااااااااي 0


    والي لقاء


    سلك



    بابكر سلك يا رائع


    تسلم اخى ايهاب

    :ANSmile23:ياسلك بمناسبة اعلان البنك المركزي في المحافظة علي العملة حدثت لي طرفة من احد اقربائي وهو كان مقيم طيلة حياته خارج الوطن ولايزال الآن يعيش في كندا بعد حصوله علي جنسيتها المهم في حرب الخليج الاولي خرج من الكويت واتي واستقر واسرته مؤقتاً في السودان وكنت حضرت في اجازة قصيرة من المملكة العربية السعودية وذهبت لزيارته في احد ايام الصيف العجيب وكنت اتصبب عرقاً طلبت منه مناديل كلينيكس والشيء المثير للدهشة انه احضر الآلة الحاسبة وبعد اجراء العملية الحسابية الخاصة به ناولني ورقة من فئة الجنيه وطلب مني أن اتمسح بها لانها ارخص من مناديل الورق:ANSmile23:


    بسم الله الرحمن الرحيم


    في السلك




    • الزعيم ماشاء الله ميه ميه


    • تسجيلات (ماتخرش ) الميه


    • اعداد في الميعاد واستعداد ميه في الميه


    • معسكر في كينيا وغيرنا يعسكر في الحتانه بالطعميه


    • وفي التاريخ بطولات جويه


    • وفي الواقع طوابق علويه ( بضم العين )


    • مريخ جديد وشديد


    • حديد


    • ما ملاحظين الكلام كلو كاساروكا وكاسراني


    • يعني البدخل رجلو في الكوره ساي بدخل في حيص بيص


    • بمناسبة حيص بيص


    • ناس حيص بيص عملوا شنو ؟


    • تعالوا اتفرجوا


    • علي واحده ونص تعالا وبص


    • استقرار واقع ومنشود


    • بس في حاجه تنقص الزعيم


    • لوحة الانجازات لابد وان تشمل بصمات كل الصفوه


    • حكومه ومعارضه


    • تعالوا نجلس في خدر المريخ الواسع والجميل


    • لنتعاون ولا نتهاون


    • تعالوا نقعد في الواطه نتصافح ونتصالح


    • ليس المطلوب منا ان نؤيد المجلس اجمعين


    • ووجود معارضه هو وضع صحي وجميل


    • معارضه ظاهره للعيان تخدم الكيان


    • معارضه تعمل علي دعم المجلس عندما يحتاجها


    • معارضه يرجع اليها المجلس اذا اعياهو النضال


    • لانريد معارضه (زي عشه ام ضنب ) نسمع بيها للتخويف ولا نراها


    • مادايرين ام بعلوا


    • دايرين نتعاون ونعارض وفقا لادب الزعيم ومن اجله فقط


    • نعن 000 نعم مريخاب احبكم


    • اجمل لوحه ان تري الوالي والصاعقه يحملان كأس افريقيا ويسلمانه لمجلس الشوري بارض المطار


    • في مريخ اجمل من كده


    • تعالوا نعمل نهارا وحتي ليلا تحت كشافاتنا التي تحول الليل نهار


    • اليوم في المريخ كلو نهار


    • اتركوا ناس الضهب يكوسوا الدهب في الخلا حق المرفعين وعشه ام ضنب


    • تعالوا نستمتع بالزعيم


    • اعداد الحكام ماشي تمام التمام


    • لكن السنه دي يلقوها عند الغافل


    • معلمين ياشاذلي


    • عرفتوها بدري بدري


    • ياربي فييرا تابع المران من الخارج ليييه !


    • يكون الكداره رايحه !


    • يكون الرصيد كمل !


    • اشحنوهوا من جديد ولو مفلسين خلوهوا استقبال لمن تفرج


    • لكن المحيرني المدرب وباقي الجهز الفني ما لاقيين حجز للرجعه لي اسي ؟


    • يكون ياربي التذاكر مشت لكن الاقامه ماطلعت ؟


    • طيب لو الاقامه ماطلعت حقو يقطعوا ماشي وجاي


    • يكون ياربي التذاكر رسلوها بالنت لكن الناس مابيه الجيه !


    • افتونا ياشاذلي


    • الحاصل شنو ؟


    • اللاعب ماداير يتمرن


    • الجهاز الفني ماداير يجي


    • اعضاء المجلس مادايرين مع المجلس


    • الناس دي كلها جاريه من الفريق ده


    • يكون ياربي الفريق ده فيهو مرفعين طفش الناس ديل ؟


    • بكون !


    • غايتو مع ناس كاسروكا الجايين من كاسراني ديل مافي طريقه


    • اديكم فكره


    • كلموا مجدي يجيب ليكم الجهاز الفني بالبلوتث


    • ويجيب ليكم المدرب برساله براهو


    • الخوف الرساله تصل فاضيه


    • يقول ليكم جزء من النص مفقود


    • ترجع التذكره ومافيها المدرب


    • سخن ياديبه


    • الله اداك


    • لكن حقك مقدم يافرده


    • في ناس مامضمونه


    • تعمل حركات والله الزول ده يدرب الفريق براهو


    • ياربي منير رجع من ايطاليا ولا لسه غاطس في البيتزا ؟


    • غيب الموت الرائع عبدالدافع عثمان


    • ومرت الايام


    • ولكن تبقي الذكري عطره طالما عطرتها ياعبدالدافع بالروائع النفيسه


    • الف رحمه تنزل عليك


    • الي جنات النعيم


    سلك كهربا


    ورق يوسف وين ! شايلنوا في فلاش ! سمح (كوبي )


    والي لقاء


    سلك


    يديك العافية يا غالي ومشكور أستاذنا الرائع بابكر سلك

    كلام في السلك



    بسم الله الرحمن الرحيم

    في السلك



    • ناس كتاااااار قالوا دايرين باقي قصة صلاح وصباح

    • انشاء الله بنرجع ليها مع الجزء التاني من كشة الكشكه

    • المهم

    • قال ليك واحد جزائري عجووووز

    • ابنته رزقت ولدا
    • وطبعا بكريه عشان كده جات ناس امها للوضوع
    • الاب الجزائري اعتاد علي حفيده الطفل
    • لما ام الطفل تمت الاربعين وزبطوا الزلابيه والمديده لملمت هديماتها ماشه بيت راجلها
    • اها
    • الابو عيونو جرن
    • وقال ليها يابتي خلي لي الولد يملي علي حياتي بدل قعدتي مع امك اليوم كلو دي
    • بعد جهد البت خلت الولد لابوها , زوجها سمح ليها
    • ضربت ليهو تلفون واخبرته برغبة والدها في بقاء حفيده معه
    • قال ليها خلاص خليهو واتخارجي ما يقوم ابوك المخرف ده يقول ليك انت زاتك اقعدي
    • المهم
    • مرن الايام وكبر الطفل واصبح يشكل ثنائيا مع الجزائري العجوز
    • يوم عمك طق الطفل كتلو
    • بوليس الجزائر
    • ونظام عام الجزائر
    • وتلات تسعات الجزائر
    • وشرطه الجزائر الموحده والماموحده
    • وشرطة الجزائر البتلبس ظهري والبتلبس مبرقع والبتلبس ملكي
    • كلهم جو وخمو ليك عمك
    • ودوهو القسم
    • وجابوا المتحري
    • المتحري قال ليهو انت كتلت الولد ؟
    • عمك قال كتلتو وتاني كان قام بكتلو
    • المتحري قال ليهو والدافع للجريمه شنو ؟ يعني السبب شنو ؟
    • عمك الجزائري دنقر ورفع راسو وقال للمتحري 000 الولد يقول لي جدو
    • يعني تاني في الجزائر الا تقول لجدك ياحاج
    • المهم
    • لجنة تأهيل استاد الهلال
    • لجنة مكافحة الملاريه
    • لجنة رفع المعاناه عن كاهل الجماهير
    • اشهر تلاته لجان
    • اكتر تلاته لجان جعجاعه ولا اري طحينا
    • الزعيم فاز في المباراه الاولي بثلاثه سيخات اقاشي
    • بدايه موفقه
    • السنه دي اقاشي الوالي
    • حايكون في السلك
    • تعال بدري وشيل سيخاتك
    • اوعه يفوتك
    • قال لي بكري المدينه شارك في التمرين ولفت الانظار
    • قلت ليهو يعني الضيف لعب احسن من اسياد البيت ؟
    • قالوا كامبوس يركز علي الجوانب المعنويه
    • يعني مثلا يقول للتعاون بختك ضربت يوسف دي جاتك من السما
    • حاتلعب تسعه شهور طرف يمين
    • ناس الرشيد علي عمر بقولوا في ما معناه ان الاهله حايصبوا جام غضبهم علي المغضوب عليهم في الانتخابات
    • وجاب سيرة الدقير وضقل وغيرهم
    • يا الرشيد انت قايل اي زول بدي صوتو في الانتخابات !
    • ده حق مكفول فقط للناس السجلوا
    • وانتوا معظمكم بطاقات ما عندكم
    • انتخابات شنو البتأثروا عليها انتوا
    • من الليله الدقير وضقل فايزين
    • والبشير والوالي ومعتصم جعفر ومحمد الياس
    • وعشان ماتزعلوا طه علي البشير برضو حايفوز عشان بنحبوا
    • انتوا ياالرشيد كوز مويه ماقدرتوا تصقطوهو في ناديكم البتجيروا فيهو بالجردل للحفله ده
    • تصقطوا مرشح !
    • والله الجير في استادكم بذكرني سينما العرضه في العيد يا روشا
    • المهم
    • ياجمال الوالي
    • المناشط تحتضر
    • حسن يوسف في السفر
    • مامون كلانا القطر صفر
    • حوض سباحه لشنو ونحنا المناشط ماعارفنها مشت وين
    • انت يا والي داير مناشط المريخ تنزل من الممتاز زي سلة الهلال ولا شنو ؟
    • اذا كان حسن يوسف مشغول فحواء المريخ ليست بالعقيمه
    • بنرجع بالتفصيل
    • الجمعه
    • بالقلعه الحمراء
    • يوم الابداع الاحمر
    • يوم القانونيين
    • اي محام او قاضي او مستشار بوزارةالعدل انعم الله عليه بالانتماء للزعيم يشرفنا يوم الجمعه
    • ومعه خمسين جنيها ان لم تك لديه عضوية النادي واربعه صور لينال شرف العضويه
    • والعندو عضويه يشرفنا ويشاركنا
    • نحن في المريخ نتنافس علي العضويه المهنيه ودعم سجل العضويه والرابطه المركزيه
    • وغيرنا الي اليوم كايس الصلح بين ناسو
    • اللهم انعمت فزد
    • المهم
    • صباح زعلانه من صلاح
    • وسنعود بالتفصيل للموضوع الجديد بتاع صلاح وصباح
    • اوعه تقول جدو في الجزائر
    سلك كهربا
    كل شاة معلقه من عصبتها 000 ياربي التعليق من العصبه بياخد كم شهر !
    والي لقاء
    سلك












    </b></i>

  2.  
     
  3. #2
    مريخي متميز
    رقم العضوية : 950
    تاريخ التسجيل : Sep 2009
    المشاركات: 148
    التقييم: 50
    معدل تقييم المستوى
    48

    افتراضي

    سلك دا جا من وين يا جماعه

  4.  
     
  5. #3
    اللجنة الفنية
    رقم العضوية : 83
    تاريخ التسجيل : Jan 2009
    المشاركات: 13,392
    التقييم: 54
    معدل تقييم المستوى
    119

    افتراضي

    بكره يقولوا ‏its‏ سلك

    ...
    توقيع مرهف
    المجد للإعجاز والإنجاز والتاريخ
    المجد للمريـخ

    ...

  6.  
     
  7. #4
    مريخي بلا حدود
    رقم العضوية : 1293
    تاريخ التسجيل : Dec 2009
    المشاركات: 1,831
    التقييم: 50
    معدل تقييم المستوى
    56

    افتراضي

    هاهاهاهـــــــــــــــــــــــــــــــــــــــــــ ـــــــــــــــاي
    والله ياسلك انت خطير وخطير باللبن كمـــــــــــــــان .
    هاهاهـــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ــــــــــــــاي
    :a039::a039::a039::a039::a039:

  8.  
     
  9. #5
    مريخي جديد
    رقم العضوية : 255
    تاريخ التسجيل : Feb 2009
    المشاركات: 6
    التقييم: 50
    معدل تقييم المستوى
    0

    افتراضي

    يوم بتقتل ليك زول
    تهي تهي تهي

  10.  
     
  11. #6
    مريخي متميز
    رقم العضوية : 950
    تاريخ التسجيل : Sep 2009
    المشاركات: 148
    التقييم: 50
    معدل تقييم المستوى
    48

    افتراضي

    والله ياجماعه طلع سلك بشحمو ولحمو
    نفس العمود في جريده السوبر

  12.  
     
  13. #7
    موقوف
    رقم العضوية : 1661
    تاريخ التسجيل : Jan 2010
    المشاركات: 30
    التقييم: 50
    معدل تقييم المستوى
    0

    افتراضي

    هههههههههههههههههههههههه
    مبااااااااااااالغة ياسلك

  14.  
     
  15. #8
    مريخي متميز
    رقم العضوية : 366
    تاريخ التسجيل : Mar 2009
    المشاركات: 179
    التقييم: 50
    معدل تقييم المستوى
    51

    افتراضي

    اقتباس المشاركة الأصلية كتبت بواسطة ehab m. Ali مشاهدة المشاركة
    • الجماعه كتر خيرهم اول امس وامس مدحوا الدافي ما خلوا ليهو شئ
    • سمعنا باولاد حاج الماحي واولاد البرعي كمداحين ممتازين
    • اولاد الارباب ديل جداد لنج
    • المهم الدافي طلع العب زول في العالم بشهادة الجماعه
    • وطبعا كانت القنبله لما اكتشفوا انو الدافي حقنا وبضاعتنا ومخزننها في بلدو
    • والمرابط برضو بضاعتنا ومخزننها في تونس
    • اقول ليكم حاجه
    • ماتستبعدوا البرنس يكون تبعنا ومخزننوا عند الجماعه
    • اصلوا المخازن جمبهم كتااااار
    • اشتري وخزن
    • والمفلس يتفرج
    • الوالي خلي المايشتريش يتفرج
    • واتفرج ياسلام
    • المايشتريش دي حلوه
    • اسم جديد للجماعه
    • يعني تاني تلقي مانشيت كبير
    • اليوم المايشتريش والمورده في ديربي خطير
    • او
    • المايشتريش يودع البطولات الافريقيه مبكرا
    • المهم الدافي طلع تبعنا
    • والجماعه جقلبوا
    • قالوا الوالي حاول ان يفشل ليهم الصفقه
    • والوالي ظهر في الرياضيه
    • وضع النقاط فوق الدولارات اقصد الحروف
    • وقال طيب
    • الناس الدخلوا مع الجماعه في صفقات وفشلت برضو الوالي فشلها ؟
    • شماعتكم بقت الوالي !
    • المهم اي فشل حقكم بقيتوا ترجعوهوا للوالي
    • كترتوها
    • ذكرتوني قصة جورج بوش الابن
    • ايام كان رئيس امريكا
    • بعد ضربة برج التجاره
    • كان بيلقي في خطاب امام مجلس الشيوخ
    • الحرس الخاص بتاعو دنقر في اضانو وقال ليهو ياريس لستك عربيتك نفس
    • جورج بوش برااااحه قال ليهو its بن لادن
    • يعني بن لادن
    • وواصل في الخطاب
    • تاني دنقر فيهو وقال ليهو جايبين ليك العصير الكبايه وقعت وانكسرت
    • بوش براحه قال its بن لادن
    • وواصل بوش في الخطاب
    • بعد شويه الحرس دنقر فيهو وقال ليهو ياريس المدام حامل
    • بوش قال ليهو its بن لادن
    • والجماعه زي بوش
    • اي حاجه يقولوا ليك its الوالي
    • حيرتونا
    • استادكم شين
    • برضوا ده من الوالي
    • عينكم للعديل تلفوا من الفيل وتطعنوا ضلو
    • المهم
    • امس فكرة انضمامي لغرفة تسجيلات الجماعه عجبت كتير من الصفوه
    • واحدين اتصلوا بي معلقين
    • وواحدين علقوا من خلال الرسائل
    • الليله اختار ليكم رسائل الصفوه لؤي مبارك
    • بالمناسبه لؤي من ناس الحتانه
    • لؤي قال في الرسائل
    • مانشيت صحيفة الهلال : قيادي هلالي يقول : سلك حاول ابتزاز الهلال وكامبوس اوصي بعدم تسجيله
    • مانشيت صحيفة المريخ: سلك يغادر غرفة الهلال ويغلق موبايلو ويختفي عن الانظار
    • مانشيت وهج الصفوه : خالة سلك : ماعافية منك يا سلك ياولدي كان مشيت الهلال
    • مانشيت صحيفة السوبر : حد يشعر بالسعاده يختار البعاد !
    • مانشيت صحيفة حبيب البلد : دولارات الوالي تعرقل انتقال سلك للهلال
    • مانشيت صحيفة المريخ اليوم التاني : سلك قعد مع الوالي وما قاااااااام
    • مانشيت صحيفة الهلال اليوم التاني : Its بن لادن
    • اولاد الارباب
    • المدحه الجايه مقبله علي وييييييييييين ؟
    • وليد البشري الهلالابي محموم وجسمو داااااااااااافي
    • الله يشفي
    • في مسلسلين جداد لنج
    • واحد اسمه الدافي مافي
    • والتاني اسمه الوجع الخرافي
    • والرشيد قال الدافي خرافي
    • خرافي ياروشا مافهمناها
    • تكون قاصد من الخرافه ولا قاصد من الخرفان !
    • ناس قسم ماصرفوا
    • its بن لادن
    • ياناس
    • قنبله وطلعت فشنك
    • افشل مفعولها خبير الدولارات
    • اقصد خبير المفرقعات
    • عرفتوا منو ؟
    • its بن لادن
    • جورج بوش الماسوره
    سلك كهربا
    its بن واااااااااااااااااااااالي
    والي لقاء
    هههههههههههههههههى احي يا مصارينى ،،:dogpile:

    والله دى جدعة كبيره خلاص ،، الله يخليك لينا يا سلك يا مبدع
    ،،

  16.  
     
  17. #9
    مريخي أون لاين
    رقم العضوية : 1453
    تاريخ التسجيل : Dec 2009
    المشاركات: 907
    التقييم: 50
    معدل تقييم المستوى
    51

    افتراضي

    سلك وديتو الرشيد علي عمر الحتانة

  18.  
     
  19. #10
    مريخي جديد
    رقم العضوية : 1297
    تاريخ التسجيل : Dec 2009
    المشاركات: 40
    التقييم: 50
    معدل تقييم المستوى
    0

    افتراضي

    بكرة بنرجع لي كلمة ماسورة منهم

  20.  
صفحة 1 من 53 1 2 3 4 5 11 51 ... الأخيرةالأخيرة

معلومات الموضوع

الأعضاء الذين يشاهدون هذا الموضوع

الذين يشاهدون الموضوع الآن: 1 (0 من الأعضاء و 1 زائر)

ظ…ظˆط§ظ‚ط¹ ط§ظ„ظ†ط´ط± (ط§ظ„ظ…ظپط¶ظ„ط©)

ظ…ظˆط§ظ‚ط¹ ط§ظ„ظ†ط´ط± (ط§ظ„ظ…ظپط¶ظ„ط©)

ضوابط المشاركة

  • لا تستطيع إضافة مواضيع جديدة
  • لا تستطيع الرد على المواضيع
  • لا تستطيع إرفاق ملفات
  • لا تستطيع تعديل مشاركاتك
  •