صحيفة المريخ اون لاين
النتائج 1 إلى 3 من 3
     
  1. #1
    مريخي رائد
    رقم العضوية : 3373
    تاريخ التسجيل : Apr 2010
    المشاركات: 156,684
    التقييم: 261
    الهوايه : الرياضة والانترنت
    معدل تقييم المستوى
    836

    Icon14 تشريح كامل متكامل لحال المريخ بقلم ناصر بابكر

    1
    2013 .. عصام الحاج أتطرق لملف الديون وحذر من الخطر البتشكله على المريخ وقرر مع المجلس المنتخب وقتها وااللي كان أستقال عنه جمال الوالي وبعض الأعضاء أنه يتم ترشيد الصرف .. الإعلام طوالي فتح نار شديدة على عصام الحاج وأعتبر أنه حديثه عن الديون تقليل من شأن الوالي وبقي الهجوم على عصام الحاج ومجلسه اللي أطلق عليه الإعلام (مجلس التقشف) مادة ثابتة في الصحف المريخية والأعمدة مع تقليل دائم من (ملف الديون) ووصفها بأنها (عادية) ولا تذكر مع مطالبة مستمرة من الاعلام لمجلس التقشف بالرحيل والتنحي ليفسح المجال لتعيين لجنة تسيير تضم عناصر أصحاب قدرات مالية عشان تحل الديون وتعمل استثمار .
    2
    بعد شهور من الضغط العنيف والحصار على المجلس والحرب عليه في عناوين الصحف والأعمدة وسخرية منه بكل الأشكال والألوان في مواقع التواصل اتنحي المجلس ورجع جمال بي لجنة تسيير كم شهر ثم واصل بي مجلس منتخب لحدي أكتوبر 2015 رحل المجلس ده .. ومر المريخ بفترة فراغ إداري أكثر من إسبوعين على ما أذكر ومافي زول قابل يشتغل في لجنة التسيير خوفا من حاجتين (ملف الديون الغامض) و(الاعلام) لحدي ما تم تعيين لجنة ونسي .. طبعا زمااان لم استقال مجلس التقشف في 2013 مفروض انه رحل لأنه قدراته المالية ضعيفة عشان يجو أصحاب قدرات مالية يعالجوا الديون .. المفاجأة أنه الديون اللقتها لجنة ونسي كانت أكبر بكتير من الديون اللقاها مجلس التشقف واتكلم عنها عصام الحاج لدرجة انه ونسي طلعت ليهو 3 أوامر قبض مقابل أمر قبض واحد لعصام الحاج ودي ديون فنادق ومؤسسات محلية غير ديون اللاعبين والمدربين الأجانب ودي الأخطر طبعا لأنه الفيفا ما بتظهر ..لجنة ونسي في بدايتها عملت مؤتمر صحفي لتوضيح الديون وإثارة الملف ده في الإعلام عشان الرأي العام المريخي يكون في الصورة والناس تتحرك لمعالجة الملف ده لأنه خطير جدا بل أخطر ملف كان وما زال بهدد المريخ حاضرا ومستقبلا، لكن كالعادة الإعلام أي زول بتكلم عن الملف ده أو بفكر يفتحه بلقي نفسه أمام وابل من الصواريخ والهجوم الإعلامي والحرب الأسفيرية ونفس الحصل مع مجلس التقشف حصل مع لجنة ونسي بل وأسوأ مع أنه (اللجنة عينها الوزير أو الدولة وكان مفروض تتكفل بدعمها ولكن ..) ونفس الساقية أستمرت مطالبة للجنة بالرحيل من الإعلام ومجلس الشوري عشان تجي لجنة مقتدرة مالية تمسك وتحل الديون وتعمل استثمار ووالي الخرطوم والوزير وقتها اتكلموا عن خطة لتحويل الأندية لمؤسسات اقتصادية ضخمة قادرة تدير نفسها بنفسها وقالوا الكلام ده محتاج رجال أعمال مقتدرين على رأس الأندية عشان كده مشت لجنة ونسي وجات لجنة برئاسة الوالي ..
    3
    اللجنة الأخيرة أشتغلت أكثر من سنة،طبعا الكلام عن تحويل المريخ لمؤسسة اقتصادية واستثمار كالعادة كان أكبر أكذوبة لخداع البسطاء وتمرير الأجندة وإقناع الرأي العام أنه الحاجة دي لي مصلحة المريخ .. والناس كالعادة بتصدق وقلنا خير كلنا عاوزين المريخ يكون منطقة خالية من الديون وعاوزين يكون فيهو استثمار .. مشت اللجنة وجات الجمعية العمومية وأغلب الناس هربت من الترشح والسبب نفسه (ملف الديون الغامض والإعلام) وجا مجلس بدون رئيس (لحدي هسي بدون رئيس) والمفاجأة برضو أن الديون كانت أكتر وأكبر من الديون اللقاها ونسي اللي مفروض انه مشي عشان تجي لجنة تحل الديون لكن البحصل في ارض الواقع أنه الديون دي كل مرة بتزيد وتتضاعف وتكبر وطبعا في كل مرة لو الناس رجعت للجرايد المريخية بتلقي أنه لحظة رحيل الوالي الجرايد بتكتب أنه المريخ منطقة خالية من الديون وانه أي حاجة مدفوعة ولو في ديون بتكون شيء لا يذكر .. المهم أنه المجلس في بداياته عمل مؤتمر صحفي للحديث عن (الطعون والديون) والملفين في بينهم ارتباط وثيق لأنه من (وعود سوداكال الإنتخابية) أنه لو بقي رئيس بحل الديون لكن جات الطعون ولحدي هسي ما اعتمد رئيس وعشان كده قبل كم شهر كتبت كم عمود طالبت لجنة التسيير بتاعت أبو القوانين انها تعتذر للوزير عن التكليف طالما المحكمة الإدارية قبلت طعون سوداكال وربطت تسليمه رئاسة النادي بنهاية قضية المجلس المنتخب ولجنة التسيير وطالبتها تعتذر عشان سوداكال يعلن رئيس بصورة رسمية ووقتها ما ح يكون عندو أي عذر أو حجة أو مبرر لعدم القيام بمسئولياته فإما كان على وعده وتكفل بحل الديون وإما طلع غير صادق وما اوفي بالوعد ووقتها كان ح يكون هو المسئول الأول بإعتباره أنه رئيس النادي .. المهم نرجع للمؤتمر وتبعاته وكالعادة طبعا السيناريو الثابت أي مجلس أو حتى فرد سواء إداري أو صحفي أو مشجع يتكلم عن الديون بعتبروا أنه المقصود جمال الوالي وده استهداف لجمال بدون يركزه على خطورة الملف نفسه وتأثيره على المريخ والخطر البشكله على النادي وتدور معارك في غير معترك وتصنيفات مع إنكار لحجم الديون الكبير وتكذيب لأي زول بكتب حقيقة متأخرات اللاعبين والمدربين الأجانب تحديداً .
    4
    مع نهاية الموسم الفات وقبل بداية الموسم ده كتبت أكثر من 10 أو 15 مقال عن ملف الديون وسلسلة بتاعت (يلا نصفر العداد) ونوهت بدل المرة ألف مرة لخطورة الملف ده لأني كنت عارف أنه أغلب ما يكتب في الصحف ما عندو علاقة بالحقيقة وكنت عارف بأنه باسكال كان 5 شهور ما صرف مرتب وعندو مقدم عقد ما صرفه وجمال سالم كان عندو مرتبات 3 شهور ونصف ومقدم عقد وكونلي 3 شهور وغارزيتو وانطونيو عندهم قروش 2015 المنصوص عليها في العقد (حافز الفوز بالدوري والكأس) غير قروش ايمال وجابسون وكوفي واورغو وديديه ليبريه وعاشور .. المهم رد الفعل على المقالات كان إما ناس بتكذب المعلومات وتنفيها كالعادة وناس بعتبروا أي تناول للديون معناها استهداف للوالي وناس كل تفكيرهم بقي منحصر واتبرمجو على أنه النادي لازم يسجل أجانب ويجيب مدربين أجانب وما عندهم استعداد حتى يقبلوا عام انتقالي تكون فيهو الأولوية لملف الديون لأنه خطير جدا وممكن عادي حتى لو سجلت محترفين وجبت مدربين وتكون بتنافس افريقيا تلقي نفسك بتخصم منك نقاط وبتتحرم من التسجيلات وبعدها تهبط لدرجة أدني .. وأي دعوات لترشيد الصرف ومنح الأولوية لحل الديون البعض بسطحية شديدة كان بصفها بأنها (تقزيم للطموحات) .
    5
    البتابع صدمة الشارع المريخي بخبر منع النادي من التعاقدات بصل لقناعة أنه في فئة كبيرة بتصدق أكاذيب الإعلام لأنه الخبر ده لأي زول عارف حقيقة ملف متأخرات وحقوق الأجانب من لاعبين ومدربين ما بتفاجأ بالقرار بل ولسه القادم أسوأ لو ما الناس بطلت السخف بتاع المع والضد والهجوم والدفاع عن أفراد وركزت على الملفات البتهم النادي وبتشكل خطر على مستقبله وعلى رأسها الديون والعضوية .. المهم لو في نقطة فاجأتني فهي أن العقوبة تكون في مستحقات مارسيال لأنه ما أعلمه أنه اللاعب فعلا وقع مخالصة وأخد في التوقيع 10 ألف دولار (راتب شهر) لكن لحدي لحظة المخالصة كان مفروض يكون أخد (80 الف دولار) وهي مقدم عقد (50 ألف دولار) وراتب 3شهور والحاجة العارفه ومتأكد منها أنه مارسيال استلم جزء بسيط جدا من مقدم العقد وما صرف إلا راتب واحد ومجموع الاستلمه بما في ذلك قروش المخالصة (25 ألف دولار) وهو وقع فعلا المخالصة لأنه هو وتالا كانوا عاوزين يتخارجوا بي أي طريقة وهم الطلبوا المغادرة ورفضوا المشاركة في التدريبات بعد العودة من البطولة العربية اللي رفضوا المشاركة فيها كل الأجانب (جمال سالم .. كونلي .. باسكال .. كلتشي .. مامادو .. تالا ومارسيال) لكن غارزيتو اجتمع بيهم واقنعهم انه يلعبوا فوافقوا إلا جمال سالم اتمسك بعد المشاركة ما لم يحصل على متأخراته .. المهم التطورات الحصلت في موضوع مارسيال سببها غالبا الوكيل آفو يارا لأنه ما كان راضي عن توقيع مارسيال على المخالصة واستفادوا من نقطة أنه المخالصة ما أتوقعت في الإتحاد وما تم عرضها علي الاتحاد عشان يعتمدها (شخصيا ما عارف مدي قانونية الخطوة دي) والخطأ الأكبر والكارثي كان من زيكو في مسألة الرد على مخطابات الفيفا وهو سبب التطور السريع في القضية والوصول لحكم بمعاقبة المريخ وده برجعنا لكوارث المكتب التنفيذي اللي كان وما زال بشكل خطر على المريخ ومن الضروووووري جدا اختيار مدير تنفيذي على درجة عالية من الكفاءة والتأهيل والحنكة وتفعيل دور اللجنة القانونية .
    6
    المهم دي فاس وقعت في الرأس، وطبعا عشان الناس تكون عارفه وعلى علم لأنه أي معلومة خاصة بملف الديون الجرايد المريخية ما بتجيبها، ملف مستحقات غارزيتو وانطونيو بتاعت 2015 اتحكم فيهو وقبل شهر تقريبا اتحول المريخ للجنة الانضباط يعني في عقوبات تاني ح تصدر ضد المريخ واجمالي المبلغ (126 ألف دولار) وحاليا لسه في مستحقات باسكال (71 ألف دولار) قيد النظر في الفيفا .. ومستحقات غارزيتو وانطونيو 2017 (260 ألف دولار) .. غير جابسون وما معروف تاني منو وغير جمال سالم (41 ألف دولار) وممكن يمشي في الطريق فوفانا .
    7
    الحاجة العاوز اقولها لي الناس المريخ قريب شديييييد من الهبوط لدرجة أدني ولو الناس واصلت في الجدل البيزنطي المسئول جمال ولا سوداكال ولا ونسي ح تلقي المريخ في ورطة تاريخية يتحمل مسئوليتها كل أهل المريخ وأنا ما عاوز أقول الدولة اللي كان بتجيب لجان تسيير وما بتدعمها وتخلي النادي يغرق أكتر كل مرة في الديون لأنه أهل المريخ هو السلموا النادي للدولة عشان تلعب بيهو زي ما دايره بدعم إداري وإعلامي ومن مجلس الشوري ومن الجماهير اللي عاوزة الحل الساهل دائما ودي حاليا النتيجة .. المهم هسي بعيداً عن الأفراد والمجالس ملف الديون ده خش نفق مظلم شديد ووصل حتة خطرة والمفروض أنه هم كل المريخاب في الفترة دي يكون كيف الناس تلحق القضايا الكتيرة دي وتحلها وزي ما الكل مسئول الكل مفروض يشارك في الحل من جمال لي سوداكال لي ونسي لي الدولة لي الإعلام اللي أعتقد أنه مفروض بعدا يفتح الملف ده وينوه لخطورته لأنه بعدا الدسدسة والغتغتة وإخفاء الحقائق بقي ما بجدي ويا الناس تلحق المريخ ويا إما تتحمل مسئولية وصمة العار التاريخية الحتلحق بالنادي

  2.  
     
  3. #2
    مريخي رائد
    رقم العضوية : 3373
    تاريخ التسجيل : Apr 2010
    المشاركات: 156,684
    التقييم: 261
    معدل تقييم المستوى
    836

    افتراضي

    من عاصر المريخ خلال الفترة المذكورة عاليه يتذمرون جيدا سيناريو ما جاء اعلاه
    والساقية لسسسسسه مدورة

  4.  
     
  5. #3
    مريخي رائد
    رقم العضوية : 1471
    تاريخ التسجيل : Dec 2009
    المشاركات: 9,943
    التقييم: 67
    معدل تقييم المستوى
    102

    افتراضي

    كان على الأستاذ ان يذكر ما دفع مقابل اللاعبين والأجهزة الفنية وتسيير أمور النادى بدلا على التركيز على ديون فى حينها لا يساوى شيئا إلا للذين فى جيوبهم عقارب ويتشدقون بتولية إدارة النادى ويبكون على الديون التافهة فى عالم المال والأعمال مثل ظ¤ظ  أو ظ¨ظ  او حتى ظ¢ظ ظ  الف دولار حتى أصغر مشجع يعلم أن كرة القدم أصبحت صناعة تحتاج إلى المال اذا كنت تريد البطولات والألقاب اما اذا كان كل همك الظهور الاعلامى وانت لا تملك دولارا واحدا فى حسابك البنكى فهذه انانية مقيته للظهور على حساب الآخرين ...
    لماذا لم ترد شكاوى فى عهود الوالى وانا اقصد فترة تحول كرة القدم لصناعة مكلفة هل لان الشاكين اليوم و بالأمس كانوا من أقرباء الوالى أم كانوا يعملون فى نادى المريخ ببلاش ولماذا اقتنعوا بكلمة الوالى وواصلوا اللعب أو الاشراف على الفريق وحتى العوامل المساعدة كالفنادق لم يصلوا لمرحلة التقاضى ...
    هؤلاء يضخمون مشكلة الديون لانهم يريدون إدارة النادى بدون أن يدفعوا وكل همهم الكنكشة فى الكراسى ما دام أن وراءهم من يبرر مواقفهم ويضع اللوم على الإدارات السابقة ... هل يعقل أن تتقدم لإدارة نادى بحجم المريخ وانت لا تملك أدنى فكرة عن الديون ومن أى ستأتى بمال تسيير نشاط النادى هل كانوا يتخيلون أن باشتراكات الأعضاء يمكنهم إدارة النادى ... مالكم كيف تحكمون

  6.  

معلومات الموضوع

الأعضاء الذين يشاهدون هذا الموضوع

الذين يشاهدون الموضوع الآن: 1 (0 من الأعضاء و 1 زائر)

ظ…ظˆط§ظ‚ط¹ ط§ظ„ظ†ط´ط± (ط§ظ„ظ…ظپط¶ظ„ط©)

ظ…ظˆط§ظ‚ط¹ ط§ظ„ظ†ط´ط± (ط§ظ„ظ…ظپط¶ظ„ط©)

ضوابط المشاركة

  • لا تستطيع إضافة مواضيع جديدة
  • لا تستطيع الرد على المواضيع
  • لا تستطيع إرفاق ملفات
  • لا تستطيع تعديل مشاركاتك
  •